فلسطینیوں کی مزاحمتی کارروائی، اسرائیل میں 20 مقامات پر آگ بھڑک اُٹھی
شیعہ نیوز : اسرائیلی میڈیا کے مطابق بدھ کو فلسطینیوں کے کاغذی جہازوں اور آتش گیر غباروں کی مدد سے20 مقامات پر آگ لگ گئی، جس کے نتیجے میں املاک اور فصلوں کو غیرمعمولی نقصان پہنچا۔
رپورٹ کے مطابق اسرائیلی فوج اور فائر بریگیڈ کی ٹیموں نے کئی گھنٹوں تک آگ بجھانے کی کوشش کی مگر آگ پر قابو نہیں پایا جا سکا۔ فلسطینیوں کے آتش گیرغباروں سے غزہ میں 20 مقامات پر آگ بھڑک اُٹھی۔
آتش زدگی کا یہ تازہ سلسلہ ایک ایسے وقت میں جاری ہے جب دوسری طرف اسرائیلی حکام کا کہنا ہے کہ گذشتہ ڈیڑھ سال کے دوران گیسی غباروں کے نتیجے میں اسرائیل کو لاکھوں شیکل کا معاشی نقصان اُٹھانا پڑا ہے۔ مجموعی طور پر 6000 دونم کے علاقے آگ کی لپیٹ میں آچکے ہیں۔ ان میں سے 400 دونم گندم کے کھیت شامل ہیں۔
گیسی غباروں کے گرنے اور آگ لگنے کے بعد اسرائیلی ریسکیو ٹیمیں اور فائر بریگیڈ کا عملہ روانہ کیا گیا۔ گرمی کی وجہ سے آگ تیزی کے ساتھ وسیع رقبے میں پھیل گئی اور اسے بجھانے میں کئی گھنٹے صرف ہو گئے۔
خیال رہے کہ اسرائیلی فوج نے غزہ کی سرحد پر فلسطینیوں کے گیسی غبارے اور کاغذی آتش گیر جہاز روکنے کے لیے نیا نظام بھی نصب کیا ہے مگر اس کے باوجود اسرائیلی حکام فلسطینیوں کے اس مزاحمتی حربے کو روکنے میں ناکام رہے ہیں۔
