قم کے 400 سے زائد ممتاز فقہا کی مراجع تقلید کے تاریخی فتوے کی حمایت
شیعہ نیوز: حوزہ علمیہ قم کے 400 سے زائد فقہا و اساتذہ نے ایک مشترکہ بیان میں، رہبر انقلاب اسلامی حضرت آیت اللہ العظمی خامنہای کو دھمکی دینے والوں کے بارے میں مراجع عظام تقلید کے تاریخی اور شجاعانہ فتوے کی بھرپور حمایت کا اعلان کرتے ہوئے کہا ہے کہ دشمنوں نے مرجعیت اور امام خامنہای کو براہ راست دھمکیاں دے کر اسلام کے قلعے پر حملہ کیا ہے۔
بیان میں کہا گیا ہے کہ آج عالم کفر دنیائے اسلام کے خلاف صف آراء ہو چکا ہے، اور برسوں سے غزہ کے مظلوم مسلمانوں کو خاک و خون میں غلطاں کیا جا رہا ہے۔ اب دشمن پہلے سے زیادہ بے حیا اور گستاخ ہو چکا ہے۔ آج اس نے اسلام کے مرکز اور قلعہ، یعنی مرجعیت کو کھلی دھمکیاں دینا شروع کر دی ہیں، اور اسلامی دنیا کی قیادت، یعنی حضرت آیت اللہ العظمیٰ امام خامنہای کو نشانہ بنایا جا رہا ہے۔ یہ شرمناک اقدام سراسر اسلام، اس کی مقدسات، اور تمام مسلمانوں کی توہین ہے۔
حوزہ علمیہ قم کے اساتذہ اور فقہا نے مراجع تقلید کے اس تاریخی اور دلیرانہ فتوی کی بھرپور حمایت کا اعلان کیا ہے جس میں ان عناصر کو "محارب” یعنی دین اور امت کے خلاف اعلانِ جنگ کرنے والے قرار دیا گیا ہے، اور ایسے افراد کے مقابلے میں تمام مسلمانوں پر دفاع کو واجب بتایا گیا ہے۔
بیان میں دنیا بھر کی حریت پسند اقوام، بالخصوص تمام مسلمانوں سے اپیل کی گئی ہے کہ وہ انسانیت کو بچانے، اسلام کی عزت کو محفوظ رکھنے اور دہشتگرد و نسل پرست حکومتوں یعنی اسرائیل اور امریکہ کے خاتمے کے لیے اٹھ کھڑے ہوں۔
بیان میں بین الاقوامی عدالتوں سے مطالبہ کیا گیا ہے کہ وہ عالمی ایٹمی ادارے کے سربراہ "رافائل گروسی”، اسرائیلی وزیر اعظم "نتن یاہو” اور امریکی صدر "ڈونلڈ ٹرمپ” کو جنگی مجرم قرار دے کر ان کا محاسبہ کریں اور مظلوم و بہادر ایرانی قوم کے حقوق کا تحفظ کریں۔
آخر میں بیان میں کہا گیا ہے کہ امام زمانہ (عجل اللہ تعالی فرجہ الشریف) کے سپاہی، یعنی حوزہ علمیہ کے علماء اور طلباء اپنے آخری سانس اور آخری قطرہ خون تک اس مقدس اسلامی نظام، شہداء کے خون، اور رہبر معظم کے دفاع میں کوشاں رہیں گے، اور جس طرح 12 روزہ جنگ میں انہوں نے عالمی استکبار کو ذلت آمیز شکست دی، اسی طرح دوبارہ امریکہ اور اس کے اتحادیوں کے عزائم کو خاک میں ملا دیں گے۔
