نفسیاتی دباؤ، جنگی صدمات اور داخلی بحران؛ 10 روز میں 3 صہیونی فوجیوں کی خودکشی
شیعہ نیوز:صہیونی ذرائع ابلاغ نے اطلاع دی ہے کہ گزشتہ 10 دنوں میں صہیونی فوج کے تین اہلکاروں نے نفسیاتی مسائل کے باعث خودکشی کرلی ہے، جس سے 7 اکتوبر 2023 کے بعد سے غزہ جنگ میں شریک صہیونی فوجیوں کی خودکشیوں کی تعداد 44 تک پہنچ گئی ہے۔
صہیونی فوجی ریڈیو نے بتایا کہ "نحال بریگیڈ” سے تعلق رکھنے والا ایک فوجی، شمالی فلسطین میں واقع جولان کی ایک فوجی چھاؤنی میں خودکشی کرگیا۔
عبرانی اخبار یدیعوت آحارونوت کے مطابق، یہ فوجی ایک سال سے زائد عرصہ تک غزہ میں جاری جنگ میں شریک رہا تھا۔
اس سے قبل بھی "گولانی بریگیڈ” کا ایک فوجی، جنوبی فلسطین کے صحرائی علاقے "سدی تیمان” کی چھاؤنی میں اپنی جان لے چکا ہے۔
رپورٹ کے مطابق، اس فوجی کو صہیونی فوج کی تفتیشی پولیس نے پوچھ گچھ کے لیے بلایا تھا۔ تحقیقات کے بعد اس کا ذاتی ہتھیار ضبط کر لیا گیا، لیکن کچھ ہی گھنٹوں بعد اس نے اپنے ساتھی کا اسلحہ لے کر خودکشی کرلی۔
اسی ہفتے اسرائیلی نیوز ویب سائٹ "واللا” نے انکشاف کیا کہ ایک اور صہیونی فوجی، جو کئی مہینوں سے غزہ اور لبنان کی سرحد پر تعینات تھا، جنگ کے خوفناک مناظر اور صدمات کے بعد شدید ذہنی دباؤ میں آ کر خودکشی کرچکا ہے۔
صہیونی میڈیا کا کہنا ہے کہ گزشتہ برس 7 اکتوبر کو غزہ پر جنگ کے آغاز کے بعد سے اب تک کم از کم 44 صہیونی فوجی جنگی صدمات، ذہنی امراض اور دباؤ کے باعث اپنی جان لے چکے ہیں۔
عبرانی اخبار ہاآرٹز نے مزید انکشاف کیا ہے کہ صرف سال 2025 کے آغاز سے اب تک 15 صہیونی فوجی خودکشی کر چکے ہیں، جب کہ 2024 کے دوران مجموعی طور پر 21 فوجیوں نے خودکشی کی تھی۔
یہ اعداد و شمار اس بات کا غماز ہیں کہ صہیونی فوج اندرونی بحران اور شدید نفسیاتی دباؤ کا شکار ہے، جو جنگی مہمات اور زمینی حقائق سے نمٹنے کی صلاحیت کھو رہی ہے۔
