کراچی پولیس کا کارنامہ، 19 شیعہ لاپتہ جوانوں کو جھوٹے مقدمات میں نامزد کرکے گرفتاری ظاہر کردی
شیعہ نیوز (پاکستانی شیعہ خبر رساں ادارہ) ڈی آئی جی ایسٹ عامر فاروقی نے پریس کانفرنس کرتے ہوئے 19 شیعہ مسنگ پرسنز کو جھوٹے مقدمات میں دہشتگرد قرار دے کر ان کی گرفتاریاں ظاہر کردی ہیں۔
تفصیلات کے مطابق ڈی آئی جی ایسٹ زون عامر فاروقی نے پریس کانفرنس کرتے ہوئے کہا ہے کہ جنوری 2019 سے مذہبی کلنگ ہورہی تھی، متعدد افراد قتل ہو چکے ہیں، ایک گروہ متحرک ہوا ہے جو پڑوسی ملک سے ٹریننگ حاصل کر آئے ہیں، گروہ کے چند افراد کو سی ٹی ڈی اور ملیر پولیس نے گرفتار کیا، ملیر پولیس نے حالیہ کارروائی میں پانچ ملزموں کو گرفتار کیا ہے، گرفتار ملزموں مین سید عمران زیدی، وقار رضا، محمد عباس، مطلوب موسوی اور سید محتشم شامل ہیں، گرفتار پانچوں پڑوسی ملک سے تربیت حاصل کرچکے ہیں، ملزم سید عمران حیدر نے متعدد افراد کی ریکی کی جو مارے گئے، گرفتار ملزموں کا کام مخصوص فرقہ کے نوجوانوں کو اپنے گروپ میں شامل کرنا بھی تھا۔
عامر فاروقی کے مطابق گرفتار ملزموں کے 6 ساتھیوں کو سی ٹی ڈی نے گرفتار کیا تھا، ملزموں کا گروہ 31 وارداتوں میں 50 افراد کو قتل کرچکے ہیں، ملزموں کا نام ریڈ بک میں بھی شامل ہے، پڑوسی ملک اس گروہ کو اسلحہ، گاڑی اور پیسہ فراہم کرتا ہے، یومیہ 40 ہزار ایک فرد کو دیا جا رہا تھا، انہیں لوگوں کا نام لاپتہ افراد کی فہرست میں شامل ہیں، کئی لوگ گرفتاری سے بچنے کے لئے خود سے روپوشی اختیار کئے ہوئے ہیں، لاپتہ افراد پر احتجاج کرنے والوں کو حقائق دے کر آگاہ کیا گیا ہے، قانون نافذ کرنے والے ادارے محنت سے کام کر رہے ہیں۔
واضح رہے کہ شیعہ لاپتہ افراد کی فہرست میں ان افراد کے نام شامل ہیں جن کو آج پولیس نے دہشت گردی کے جھوٹے الزام میں پیش کیا ہے۔ پولیس نے ڈرامائی کہانی بناتے ہوئے کہا کہ یہ افراد خود لاپتہ تھے، جبکہ ان کے اہل خانہ کا کہنا ہے کہ ان افراد کو ریاستی اداروں نے ان کے گھروں سے چادر اور چار دیواری کا تقدس پامال کرتے ہوئے اغوا کیا تھا، جس میں سے بعض افراد کی سی سی ٹی وی فوٹیج بھی موجود ہے۔
