بھارت کے ساتھ 1965 کی جنگ پاکستان کی دفاعی تاریخ کا روشن باب ہے، شہباز شریف
شیعہ نیوز ( پاکستانی شیعہ خبر رساں ادارہ )وزیراعلٰی پنجاب محمد شہباز شریف نے لاہور میں یوم دفاع کی مناسبت سے میڈیا سے گفتگو کرتے ہوئے کہا ہے کہ 1965 میں پاک افواج نے وطن عزیز کے دفاع کے لئے دشمن کو منہ توڑ جواب دیا۔ ان کا کہنا تھا پاک افواج آج بھی دہشت گردی کےخلاف جنگ میں بہادری کی نئی تاریخ رقم کر رہی ہیں۔
زرائع کے مطابق یوم دفاع پاکستان کے موقع پر اپنے خصوصی پیغام میں وزیراعلٰی پنجاب کا کہنا تھا کہ بھارت کے ساتھ 1965 کی جنگ پاکستان کی دفاعی تاریخ کا روشن باب ہے، پاکستان کی بہادر افواج نے دشمن کے مذموم عزائم کو خاک میں ملایا۔ شہباز شریف کا کہنا تھا کہ آج بھی پاکستان کا دفاع ناقابل تسخیر ہے، وطن عزیز کی طرف کوئی میلی آنکھ سے نہیں دیکھ سکتا، پاک افواج دہشت گردی کے خلاف جنگ میں بہادری کی نئی تاریخ رقم کر رہی ہیں۔ ان کا کہنا تھا کہ پاکستان مسلم لیگ نواز حکومت نے 1998ء میں ایٹمی دھماکے کر کے ملکی دفاع کو ناقابل تسخیر بنایا اور اب وزیراعظم محمد نوازشریف کی قیادت میں مسلم لیگ نواز پاکستان کو معاشی طور پر مضبوط بنائے گی۔
