کراچی میں رینجرز سے مقابلہ میں 2تکفیری دہشتگرد ہلاک

شیعہ نیوز (پاکستانی شیعہ خبر رساں ادارہ)کراچی میں ناردرن بائی پاس پر رینجرز کے ساتھ مقابلے میں 2 تکفیری دہشت گرد ہلاک ہو گئے۔ رینجرز ترجمان کے مطابق ہلاک ہونیوالے تکفیری دہشتگرد سیکورٹی اہلکاروں کے قتل میں ملوث تھے جبکہ شہر کے مختلف علاقوں میں رینجرز کی کارروائیوں کے دوران 2 مشتبہ افراد حراست میں لیے جانے کی اطلاعات ہیں۔ ترجمان رینجرز کے مطابق حساس اداروں کی رپورٹ پر ناردرن بائی پاس پر دہشت گردوں کے ٹھکانے پر چھاپا مارا گیا۔ چھاپے کے دوران دہشت گردوں کی جانب سے فائرنگ کی گئی۔ رینجرز اہلکاروں کی جوابی فائرنگ سے 2 تکفیری دہشت گرد ہلاک ہو گئے۔ دہشت گردوں کے قبضے سے دستی بم اور اسلحہ برآمد کر لیا گیا ہے

دوسری جانب اولڈ سٹی ایریا کے علاقے بھیم پوری میں رینجرز نے 2 رہائشی مکانات میں سرچ آپریشن کیا جس کے دوران ایک مشتبہ شخص کو حراست میں لے لیا گیا ہے۔ پاکستان چوک کے قریب سیاسی جماعت کے انتخابی کیمپ پر چھاپے کے دوران عامر نامی شخص کو حراست میں لے لیا گیا ہے