کراچی پولیس کی کارروائیاں، کالعدم تنظیم کے 2 دہشتگردوں سمیت 3 ملزمان ہلاک
شیعہ نیوز ( پاکستانی شیعہ خبر رساں ادارہ ) شہر قائد کے علاقے گلشن معمار اور لیاری میں سرچ آپریشن کے دوران فائرنگ کے تبادلے میں 2 دہشت گردوں سمیت 3 ملزمان ہلاک ہوگئے۔ تفصیلات کے مطابق کراچی کے علاقے گلشن معمار میں پولیس کے کاؤنٹر ٹیررازم ڈیپارٹمنٹ نے مصدقہ اطلاعات پر کارورائی کی، کارروائی کے دوران 2 دہشت گرد ہلاک ہوگئے۔ سی ٹی ڈی حکام کا کہنا ہے کہ دونوں ملزمان کا تعلق کالعدم تنظیم سے تھا، ایک دہشتگرد خودکش حملہ آور کو ضروری تربیت فراہم کرتا تھا، جبکہ دوسرا کراچی میں سیکیورٹی اہلکاروں سمیت سوات امن کمیٹی کے ارکان کے قتل میں بھی ملوث ہے۔ دوسری جانب پولیس نے لیاری کے علاقے شاہ بیگ لین میں کارروائی کی، فائرنگ کے تبادلے میں ایک ملزم ہلاک ہوگیا۔ ہلاک ہونے والے ملزم کی شناخت اللہ بخش عرف چاچو کے نام سے ہوئی ہے۔ اس کے علاوہ شہر کے دیگر علاقوں سے 12 افراد کو حراست میں لیا گیا ہے۔
