حکومتی مجرمانہ غفلت، 2ہزار زائرین کا کوئٹہ کی جانب پیدل مارچ

شیعہ نیوز (پاکستانی شیعہ خبر رساں ادارہ) پاک ایران بارڈر’’ تفتان‘‘ پر 2ہزار سے زائدزائرین نے حکومت کی جانب سے زائرین کو پریشان کرنے اور 2 ہفتے سے زائد گزرنے کے باوجود ٹرانسپورٹ کے انتظامات نہ کرنے پر احتجاجاً کوئٹہ کی جانب پیدل مارچ شروع کردیا ہے۔

تفصیلات کے مطابق ایران عراق کے مقامات مقدسہ کی زیارات کے بعد واپس والے2ہزار سے زائدزائرین کو کرونا وائرس کے خدشے کے پیش نظر تفتان بارڈرپر آئسولیشن میں رکھا گیا تھا 14روز آئسولیشن میں گزارنے اور کرونا وائرس سے پاک قرار پانے کے باوجود انتظامی اداروں نے ان پریشان حال زائرین کی کوئٹہ روانگی کے لئے کانوائے کا انتظام نہیں کیا۔

ذرائع کے مطابق انتظامیہ کی جانب سے ایران اور عراق سے واپس آنے والے زائرین کو 14روز آئسولیشن میں رکھنے کے بعد 7مارچ کو کانوائے کی صورت میں کوئٹہ روانہ کرنے کا اعلان کیا گیا تھا پھر نامعلوم وجوہات کی بناءپر ایک روز تاخیر کے بعد کانوائے کی کوئٹہ روانگی کیلئے8مارچ کی تاریخ کا اعلان کیا تھا لیکن 9مارچ تک کانوائے فراہم نہ کرنے پر زائرین نے بھرپوراحتجاج کیا اور پیدل کوئٹہ کی جانب مارچ شروع کردیا۔

واضح رہے کہ د تفتان بارڈر کے بیابان میں 2ہزار سے زائد زائرین دو ہفتےتک بے یارو مددگار پڑے رہے، قلیل زادراہ کے ہمراہ سفر زیارات سے واپس وطن لوٹنے والے زائرین جو پہلے ہی ایران میں طویل قیام کی صعوبت برداشت کرچکے تھے انہیں تفتان بارڈر پر غیر ضروری اور تھکادینے والا قیام بھگتنا پڑا اور ستم بالائے ستم ان زائرین کو تاحال اپنے گھروں کو واپسی کیلئے کانوائے تک فراہم نہیں کیا گیا۔

شیعہ تنظیموں اور قائدین نے تفتان بارڈرپر محصورزائرین کو کانوائے فراہم نا کرنے پر تشویش کا اظہار کیا ہے اور انہوں نے بلوچستان حکومت سے مطالبہ کیا ہے کہ کوئٹہ کی جانب پیدل مارچ کرنے والے زائرین کو فول پروف سکیورٹی اور فوری طور پر کانوائے فراہم کیا جائے تاکہ تمام زائرین باحفاظت اپنے گھروں کو پہنچ سکیں ۔