کراچی، محرم الحرام کے دوران سرچ آپریشن، 20 مشتبہ افراد گرفتار

شیعہ نیوز (پاکستانی شیعہ خبر رساں ادارہ) محرم الحرام کے دوران امن و امان برقرار رکھنے کیلئے سکیورٹی اداروں نے کمر کس لی، رات گئے سرچ آپریشن کے دوران 20 مشتبہ افراد کو گرفتار کرلیا گیا ہے۔ تفصیلات کے مطابق محرم الحرام کے دوران امن و امان کو یقینی بنانے کے لیے قانون نافذ کرنے والے ادارے متحرک ہیں، جرائم پیشہ عناصر کی سرکوبی کیلئے سرچ آپریشن اور گرفتاریاں جاری ہے۔ صدر اور آرام باغ میں محرم الحرام کے جلوس کے راستوں میں آنے والے مسافر خانوں، بس اڈوں اور عمارتوں میں سرچ آپریشن کیا گیا۔ پولیس کے مطابق آپریشن جرائم پیشہ افراد کی موجودگی کی اطلاع پر کیا گیا جبکہ 20 مشتبہ افراد کو حراست میں لے لیا گیا ہے۔ پولیس کی بھاری نفری نے آپریشن میں حصہ لیا اور مسافر خانوں میں موجود افراد کی تلاشی لی اور ان کے کوائف معلوم کئے جبکہ حراست میں لئے گئے افراد کے پاس شناختی کارڈ نہ ہونے کے باعث مزید تفتیش کی جارہی ہے۔