کراچی میں علی رضا امام بارگاہ پر احتجاجی دھرنا، علامہ راجہ ناصر اور آغا رحت کا خطاب

سانحہ گلگت بلتستان اور پارا چنار میں نمازیوں پر وحشیانہ حملوں میں امریکہ،اسرائیل اور ہندوستان ملوث ہیں،امریکہ،اسرائیل اور ہندوستان شیطانی طاقتیں ہیں جو پاکستان کو داخلی طور پر عدم استحکام کا شکار کرنا چاہتے ہیں،امریکی و اسرائیلی سازشوں کو ناکام بنا دیں گے۔
مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کا کراچی میں احتجاجی ماتمی جلوس سے خطاب

 

کراچی( )سانحہ گلگت بلتستان اور پارا چنار میں نمازیوں پر وحشیانہ حملوں میں امریکہ،اسرائیل اور ہندوستان ملوث ہیں،امریکہ،اسرائیل اور ہندوستان شیطانی طاقتیں ہیں جو پاکستان کو داخلی طور پر عدم استحکام کا شکار کرنا چاہتے ہیں،امریکی و اسرائیلی سازشوں کو ناکام بنا دیں گے۔ان خیالات کا اظہار مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری ،کراچی ڈویژن کے سیکرٹری جنرل محمد مہدی،مولانا حیدر عباس،مولانا صادق رضا تقوی،مولانا علی انور جعفری اور دیگر نے گلگت بلتستان جانے والے زائرین کی بس پر ہونے والی وحشیانہ دہشت گردی کی مذمت کرتے ہوئے نکالی گئی احتجاجی ماتمی ریلی سے خطاب کرتے ہوئے کیا۔
احتجاجی ماتمی جلوس میں سیکڑوں عزاداران امام حسین علیہ السلام شریک تھے جنہوں نے ہاتھوں میں سیاہ اور سرخ علم اٹھا رکھے تھے اور لبیک یا حسین علیہ السلام کے فلک شگاف نعرے لگا رہے تھے،احتجاجی ماتمی جلوس کا آغاز مسجد شاہ خراسان سے بعدنماز مغرب ہوا جس کا اختتام مسجد و امام بارگاہ علی رضا ایم اے جناح روڈ پر ہوا۔شرکائے ماتمی جلوس نے امریکہ ،اسرائیل اور ہندوستان کے خلاف زبردست نعرے بازی کی اور حکومت پاکستان سے مطالبہ کیا کہ حکومت پاکستان امریکی دہشت گرد حکومت سے تعلقات منقطع کرے۔
سانحہ گلگت بلتستان کے سلسلہ میں نکالے گئے احتجاجی ماتمی جلوس سے خطاب کرتے ہوئے مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کاکہنا تھا کہ زائرین کی بس پر گلگت بلتستان جاتے ہوئے سفاک دہشت گردوں کا وحشیانہ حملہ اس بات کی غمازی کرتا ہے کہ خطے میں حکومت کی کوئی رٹ قائم ہی نہیں ہے انہوں نے کہا کہ عالمی دہشت گرد امریکہ،اسرائیل اور ہندوستان پاکستان میں ملت جعفریہ کا قتل عام کر کے مملکت خداداد پاکستان کو فرقہ واریت کی آگ میں لپیٹنا چاہتے ہیں تاہم ملت جعفریہ پاکستان دشمن کی ان ناپاک سازشوں کو ناکام بنانے کے لئے ہر ممکنہ اقدام کرے گی ۔
مجلس وحدت مسلمین پاکستان کے سربراہ کاکہنا تھا کہ حکومت پاکستا ن کو چاہئیے کہ امریکی نواز دہشت گردوں کے خلاف زبانی کلامی جمع خرچ کرنے کی بجائے عملی کاروائی انجام دے اور ملک بھر میں درجنوں مقدمات میں ملوث کالعدم دہشت گرد گروہوں کے امریکی نواز دہشت گردوں کو لگام دے تا کہ ملک بھر میں ملت جعفریہ کا قتل عام روکا جائے ۔
ان کاکہنا تھا کہ گلگت بلتستان جانے والے زائرین کی بس پر وحشیانہ حملہ اور درجنوں معصوم انسانوں کی شہادت ایک افسوس ناک فعل ہے جو کہ نا قابل برداشت ہے ۔اس موقع پر شرکائے احتجاجی ماتمی جلوس نے دہشت گردی نا منظور ،لبیک یا حسین علیہ السلام،مردہ باد امریکہ،مردہ باد اسرائیل،مرد ہ باد ہندوستان سمیت شہہید کی جو موت ہے وہ قوم کی حیات کے کے فلک شگاف نعرے بلند کئے اورا س عزم کا اظہار کیا کہ دشمن کی سازشوں کو کسی صورت بھی کامیاب نہیں ہونے دیا جائے گا۔

دوسری جانب سانحہ گلگت کے سلسلہ میں کراچی میں مجلس وحدت مسلمین پاکستا ن کراچی ڈویژن اور دیگر ملی جماعتوں کے زیراہتمام احتجاجی ماتمی جلوس مسجد شاہ خراسان سے بعد نماز مغربین نکالا گیا جو کہ اب دھرنے کی صورت اختیار کر چکا ہے جبکہ احتجاجی دھرنے میں ہزاروں افرادشریک ہیں او ر سیکڑوں افراد گھروں سے نکل کر دھرنے میں شریک ہو رہے ہیں ۔

واضح رہے کہ دھرنا شاہراہ قائدین (شاہراہ پاکستان)پر دیا جا رہا ہے ۔

جبکہ گلگت سے مولانا آغا راحت حسین الحسینی کراچی کے شرکائے احتجاج سے بزریعہ ٹیلی فونک خطاب کر رہے ہیں۔جبکہ ان کاکہنا ہے کہ اگر پاکستان کے پانچ کروڑ شیعہ اپنا حق لینے کے لئے اٹھ کھڑے ہوئے تو حکومت کہاں جائے گی؟ان کاکہنا تھا کہ وقت آ گیا ہے کہ ہم اپنا حق لیں ۔