بے گناہ گرفتار نوجوانوں کو رہا اور بلاجواز گرفتاریاں بند کی جائیں، علامہ ناظر عباس تقوی

شیعہ علماء کونسل کے صوبائی رہنما علامہ ناظر عباس تقوی نے کہا ہے کہ ہمارے مطالبات پہ غور نہ کیا گیا تو اگلے لائحہ عمل کا اعلان کریں گے۔ ان خیالات کا اظہار انہوں نے کراچی پریس کلب میں پریس کانفرنس سے خطاب کرتے ہوئے کیا۔ اس موقع پر ان کے ہمراہ علامہ جعفر سبحانی سمیت دیگر رہنما بھی موجود تھے۔ کانفرنس سے خطاب میں علامہ ناظر عباس تقوی نے کراچی کے موجودہ حالات پر تشویش کا اظہار کیا اور کہا کہ اگر ہمارے مطالبات پہ غور نہ کیا گیا تو اگلے لائحہ عمل کا اعلان کریں گے، اس سلسلے میں عوامی رابطہ مہم کا آغاز کر دیا گیا ہے۔ ان کا کہنا تھا کہ بے گناہ گرفتار کئے گئے نوجوانوں کو فی الفور رہا کیا جائے اور بلاجواز گرفتاریاں بند کی جائیں اور کراچی کو اسلحہ سے پاک کیا جائے۔
علامہ ناظر عباس تقوی نے مزید کہا کہ سکیورٹی ادارے بے حسی کا شکار ہیں، ریاست کے اندر ریاست بن گئی ہے اس کو کنٹرول کیا جائے ورنہ عوامی سمندر ایوانوں کا رخ کرے گا، ہم نے قائد ملت جعفریہ کے حکم پہ آج کی پریس کانفرنس کی ہے، اگر مطالبات پر عملدرآمد نہ کیا گیا تو آئندہ کا لائحہ عمل بھی قیادت کے حکم کے مطابق طے کریں گے۔