پاکستانی شیعہ خبریں
کراچی:سانحہ حضرت عبداللہ شاہ غازی ! شیعہ رہنماؤں کی مذمت
جعفریہ الائنس پاکستان،مجلس وحدت مسلمین پاکستان،امامیہ اسٹوڈنٹس آرگنائزیشن پاکستان،امامیہ آرگنائزیشن پاکستان،مرکزی تنظیم عزائ،شیعہ علماء کونسل،اور دیگر شیعہ جماعتوں کے رہنماؤں نے کراچی میں حضرت عبد اللہ شاہ غازی رحمۃ اللہ علیہ کے مزار اقدس پر ہونے والے بم دھماکوں کی شدید مذمت کی ہے۔شیعہ رہنماؤں نے کہا ہے کہ پاکستان میں مزارات اولیائے کرام پر حملے کرنے والے ناصبی دہشت گردوںکا تعلق انہی دشمنان اسلام و اہل بیت علیہم السلام سے ہے کہ جنہوں نے ماضی میں اہل بیت اطہار علہم السلام اور اولیا اللہ کے مزارات کو جنت البقیع اور جنت المعلیٰ میں تاراج کیا تھا،جبکہ آج صہیونی زیر اثر ناصبی گروہ مملکت خداد پاکستان میں امریکی ایماء پر ملک کو کمزور کرنے کے لئے شہروں ،گلی کوچوں ،بازاروں،سرکاری دفاتر،مساجد امام بارگاہوں اور اب مزارات مقدسہ پر حملے کر رہے ہیں تا کہ امت میںانتشار پیدا کر کے باہم دست و گریباں کروایا جا سکے اور مملکت خداداد پاکستان کو عدم استحکام کا شکار کر کے اپنے غیر ملکی آقاؤں امریکا،اسرائیل ،برطانیہ اور بھارت اور دیگر کو خوش کیا جائے۔
شیعہ رہنماؤں کاکہنا تھا کہ ملک بھر میں اہل سنت جماعتوں کی جانب سے دی جانے والی تین روزہ سوگ کی اپیل پر مکمل حمایت کا اعلان کرتے ہیں اور ملت جعفریہ اس مصیبتا ور دکھ کی گھڑی میں شہدائے سانحہ غازی کے لواحقین سے دلی ہمدردی کا اظہار کرتی ہے اور حکومت سے مطالبہ کرتے ہیںکہ سانحے میں ملوث دہشت گردوں کو فی الفور گرفتار کر کے منظر عام پر لایا جائے اور سخت سے سخت سزا دی جائے۔
