انچولی، تکفیری دہشتگردوں کی فائرنگ سے سید شہاب حیدر نقوی شہید

شیعہ نیوز (کراچی) پاکستان کے سب سے بڑی تجارتی مرکز کراچی کے علاقے انچولی سوسائٹی میں کوالٹی بیکری کے سامنے مدینہ پان شاپ پر تکفیری دہشتگردوں کی فائرنگ سے دکان کے مالک سید شہاب حیدر نقوی شہید ہوگئے۔ نمائندے کی اطلاعات کے مطابق تکفیری دہشتگردوں نے شہاب حیدر کو اس وقت کو اپنی درندگی کا نشانہ بنایا جب وہ اپنی دکان میں بیٹھے تھے کہ موٹر سائیکل سوار دہشتگردوں نے فائرنگ کردی جس سے وہ شدید زخمی ہوگئے جنہیں عباسی شہید ہسپتال منتقل کیا گیا، جہاں وہ زخموں کی تاب نہ لاتے ہوئے جام شہادت نوش کرگئے۔ شہید شہاب حیدر انچولی بلاک 17 کے رہائشی تھے۔ شہید کے جسد خاکی کو انچولی امام بارگاہ منتقل کردیا گیا ہے۔ شہید شہاب حیدر کی نماز جنازہ منگل کے روز بعد از نماز ظہرین ادا کی جائے گی۔ شہید سید شہاب حیدر مجلس وحدت مسلمین پاکستان ضلع ملیر کے سیکریٹری جنرل احسن عباس رضوی کے ماموں تھے۔