سعودی ریال کے ذریعے مساجد کے نام پر دہشتگردی کے مراکز قائم کئے جارہے ہیں، ثروت اعجاز قادری

شیعہ نیوز (کراچی) سربراہ پاکستان سنی تحریک محمد ثروت اعجاز قادری نے کہا ہے کہ عوام اہلسنت بانیان پاکستان کی اولاد اور ملک کا قیمتی سرمایہ ہیں، دہشتگردی میں ملوث قوتیں نظریہ پاکستان کی باغی ہیں، دہشتگردوں کے اکابرین نے پاکستان بنانے کی مخالفت کی اور آج ان کی اولادیں پاکستان کو تباہ کرنے کیلئے دہشتگردی کررہے ہیں، اہلسنت طالبان کی دہشتگردی سے خوفزدہ ہونے والے نہیں ملک بچانے کے لئے اپنی جان مال اولاد سب قربان کردیں، شہادت ہمارا زیور ہے دہشتگردی کے خاتمے کیلئے پاک فوج کو تنہا نہیں چھوڑیں گے، اگر حکومت نے دہشتگردوں کے خلاف جہاد کا اعلان کیا تو ہر گلی سے لبیک یارسول اللہ کی صدا گونجے گی، پاکستان اسلام کا قلعہ ہے اسے مٹانے کا خواب دیکھنے والے خود صفحہ ہستی سے مٹ جائیں گے، دو قومی نظریہ کے خلاف انگلی اٹھانے والے آج دیکھ لیں کہ ان کی اولادوں نے دہشتگردی کے ذریعے اسلام اور پاکستان کے خوبصورت چہرے کو مسخ کرنے کی ناپاک کوشش کی ہے ہیں، نام نہاد طالبان کے پاکستان میں موجود قائدین نے اول روز سے ہی پاکستان بننے کی مخالفت کی اور آج ملک کو تباہی اور قتل و غارتگری میں بھی ان ہی کے ہاتھ رنگین ہیں۔ ان خیالات کا اظہار انہوں نے کراچی میں دہشتگرد طالبان کے خلاف مساجدوں میں یوم مذمت کے اجتماعات سے مواصلاتی خطاب کرتے ہوئے کیا۔

انہوں نے کہا کہ حکومت کو دہشتگردوں اور ان کو تحفط دینے والوں کے خلاف بولٹ ایکشن لینا چاہیے۔ انہوں نے کہا کہ پاکستان میں کسی کی ذاتی اور سیاسی شریعت نہیں صرف اور صرف شریعت محمد ﷺ کو ہی رائج کیا جائے گا، بندوق کے زور پر کسی کو اپنا مسلک مسلط کرنے کی اجازت نہیں دی جائے گی۔ سعودی ریال کی ریل پیل سے مساجد کے نام پر دہشتگردی کے مراکز قائم کئے جارہے ہیں، سعودی حکومت پا کستان میں مذہبی فرقہ واریت پھیلا رہی ہے۔ ثروت اعجاز قادری نے کہا کہ طالبان کا خوف صرف حکومتی ایوانوں میں ہے عوام ایسے عناصر کو زندہ دفن کر دیں گے، ملک میں دہشتگردی اور فرقہ واریت کو ہوا صرف حکمرانوں کی عدم دلچسپی کے سبب ہے ورنہ کسی کی کوئی اوقات نہیں کہ وہ پاکستان میں غیر ملکی ایجنڈا مسلط کرے، عوام جان و مال اورعزت کو پامال کرنے والوں کو قانون اور آئین کے مطابق سزائیں دی جائیں، تعجب ہے کہ عدلیہ آزاد ہونے کے باوجود بھی 4000 گرفتار دہشت گردوں میں سے کسی کو آج دن تک کوئی سزا نہیں ہوئی ہے جس کے سبب دہشتگردوں کے حوصلے بلند ہوئے۔