صوابی، پولیس لائن پر خود کش حملے کی کوشش ناکام

شیعہ نیوز(کے پی کے) خیبر پختونخواہ کے ضلع صوابی میں پولیس لائن کے اندر ایک مشتبہ شخص نے داخل ہونے کی کوشش کی۔ بتایا جارہا ہے کہ وہ خودکش حملے کی نیت سے داخل ہورہا تھا۔ پولیس کی فائرنگ سے مبینہ خود کش حملہ آور ہلاک ہوگیا، جبکہ حملہ آور کی فائرنگ سے ایک پولیس اہلکار بھی زخمی ہو گیا۔ حکام کے مطابق مبینہ خود کش حملہ آور صوابی میں شاہ منصور پولیس لائن کے اندر داخل ہونے کی کوشش کررہا تھا کہ گیٹ پر موجود پولیس اہلکاروں نے اسے روکا، جس پر حملہ آور نے فائرنگ شروع کر دی۔ پولیس کی جوابی کاروائی سے مبینہ خود کش حملہ آور ہلاک ہو گیا،جبکہ ایک پولیس اہلکار زخمی ہوا، اس واقعہ کے بعد پولیس نے علاقے کو گھیرے میں لے لیا۔ ذرائع کے مطابق ڈی پی او صوابی سجاد خان کا کہنا ہے کہ حملہ آور کے پاس میگزین اور پستول تھے، اس کے پاس خودکش جیکٹ نہیں تھی۔ زخمی پولیس اہلکار کو ابتدائی طبی امداد کے بعد پشاور منتقل کر دیا ہے ۔