غاصب حکمرانوں کیخلاف عوامی ضرب عضب کا جلد آغاز ہو گا،علامہ راجہ ناصر عباس جعفری
شیعہ نیوز (لاہور) مجلس وحدت مسلمین پاکستان کے سربراہ علامہ راجہ ناصر عباس جعفری نے پاکستان عوامی تحریک کے پرامن اور جمہوری جدوجہد کی مشروط حمایت کا اعلان کرتے ہوئے کہا کہ موجودہ حکمران اخلاقی، قانونی اور آئینی طور پر حق حکمرانی کھو چکے ہیں، پاکستان کے تمام محب وطن اور جمہوری قوتوں کو چاہیئے کہ وہ ان خائن اور ظالم حکمرانوں کیخلاف میدان عمل میں نکلیں اور مظلوموں کو ان کا حقوق دلانے میں کردار ادا کریں۔ سربراہ مجلس وحدت مسلمین پاکستان علامہ ناصر عباس جعفری پاکستان عوامی تحریک کے مرکزی سیکرٹریٹ پر علامہ ڈاکٹر طاہرالقادری، چئیرمین سنی اتحاد کونسل صاحبزادہ حامد رضا، مسلم لیگ قاف کے رہنماء چوہدری پرویز الہی کے ہمراہ مشترکہ پریس کانفرنس سے خطاب کر رہے تھے۔
حکمرانوں نے قاتلوں کو پناہ دی
علامہ راجہ ناصر عباس کا کہنا تھا کہ پاکستان میں گذشتہ 35 سالوں سے ہماری قوم کی نسل کشی ہوئی جو کہ اب بھی جاری ہے، لیکن ان ظالم حکمرانوں نے ہمیشہ سے قاتلوں اور ظالموں کو پناہ دی اور مظلوموں کے خون کا مذاق اُڑیا، اب ہم اپنے شہداء کے پاک لہو کو رائیگان نہیں جانے دینگے، دشمن ہمیں تقسیم کرکے حکمرانی کرنے کا خواب دیکھنا چھوڑ دے انشااللہ اس ملک کو مشکلوں کے دلدل سے اس کے باوفا بیٹے ہی نکالیں گے۔
ظالموں کے خلاف عوامی ضرب عضب
علامہ ناصر عباس کا کہنا تھا کہ پاک فوج نے دہشت گردوں کے کیخلاف ضرب عضب کا آغاز کامیابی کیساتھ شروع کردیا ہے اب ان غاصب حکمرانوں کیخلاف عوامی ضرب عضب کا جلد آغاز ہو گا جس سے ان غاصبوں اور ظالموں کا صفایا ہوگا۔ پریس کانفرنس کے بعد علامہ راجہ ناصر عباس جعفری کے سربراہی میں مجلس وحدت مسلمین کے اعلیٰ سطح کے وفد نے علامہ ڈاکٹر طاہر القادری سے خصوصی ملاقات کی اور آئندہ کے لائحہ عمل پر غور کیا گیا۔
