پشاور، چرچ دھماکوں کو ایک سال بیت گیا، دہشتگرد کیفر کردار تک نہ پہنچ سکے

شیعہ نیوز (پشاور) آج سے ٹھیک ایک سال قبل پشاور کے آل سینٹ چرچ آف پاکستان میں قیامت برپا ہوئی، جب دو خودکش حملہ آوروں نے چرچ کے احاطے میں گھس کر خود کو اڑادیا۔ جس کے نتیجے میں مسیحی برادری کے سو سے زیادہ افراد ہلاک اور 200 سے زائد زخمی ہوئے۔ ایک سال بیت گیا لیکن آج بھی یہ سانحہ دلوں میں تلخ یاد بن کر تازہ ہے۔ کیس کی فائل الماریوں میں ہمیشہ کے لئے بند ہوگئی ہے۔ پولیس حکام کا دعویٰ ہے کہ جس شدت پسند گروپ نے یہ کارروائی کی تھی، اس کے ذمہ داران خیبر ایجنسی میں فوجی آپریشن میں مارے گئے۔ تاہم حقیقت یہ ہے کہ آج تک کسی دہشتگرد کو کیفر کردار تک نہیں پہنچایا گیا، سانحے کی یاد میں مسیحی برادری کی امن ریلیاں اور دعائیہ تقریبات جاری ہیں۔ جو ماہ رواں کے اختتام تک جاری رہیں گی۔ چرچ کی دیواروں پر ان بے گناہوں کی تصاویر آویزاں ہیں جو اس دہشت گردی کا نشانہ بنے۔