نوازشریف بحرین میں کرائے کے قاتل بھیجنے سے اجتناب کریں، علامہ مقصود علی ڈومکی

شیعہ نیوز (کوئٹہ) مجلس وحدت مسلمین بلوچستان کے سربراہ علامہ مقصود علی ڈومکی نے کہا ہے کہ علامہ یعقوب علی توسلی نے تبلیغ دین اور اتحاد بین المسلمین کیلئے گرانقدر خدمات انجام دیں۔ ملک و ملت کیلئے انکی خدمات کو کبھی نہیں بھلایا نہیں جا سکتا۔ دریں اثناء علامہ مقصود علی ڈومکی کا مزید کہنا تھا کہ نوازشریف بحرین میں کرائے کے قاتل بھیجنے سے اجتناب کریں۔ دہشتگردی، ہیروئن اور کلاشنکوف کلچر افغانستان میں مداخلت کا تحفہ ہے۔ نواز شریف ماضی کی غلطیوں سے سبق سیکھیں اور بحرینی ڈکٹیٹر کے غیر جمہوری اقتدار کو بچانے کیلئے، بحرین کے معصوم، نہتے، انقلابی عوام پر ظلم و تشدد کا حصہ نہ بنیں۔ ہمیں ایک آزاد، خودمختار اور غیرت مند قوم کی حیثیت سے اپنے آپ کو منوانا ہوگا۔ جو اپنے فیصلے اصولوں کی بنیاد پر کرتے ہیں۔ جو جز وقتی مفادات اور زر و زور کے بدلے اپنے ضمیر نہیں بیچتے۔ ہم اگر کسی مظلوم نہتی قوم کا ساتھ نہیں دے سکتے تو کم ازکم کرائے کے قاتل بننے سے اجتناب کریں۔ انہوں نے کہا کہ انتخابات میں دھاندلی کسی ایک پارٹی کا نہیں بلکہ ملک و ملت کی بقا اور سربلندی کا مسئلہ ہے۔ انتخابات میں دھاندلی کے مجرموں کو قانون کے کٹہرے میں کھڑا کرنا از بس ضروری ہے۔ جس کے لئے ہم تحریک انصاف کے اصولی موقف کے حامی ہیں۔ شفاف انتخابات کے بغیر جمہوریت ایک دھوکا ہے، نواز حکومت با اختیار جوڈیشل کمیشن کے سلسلے میں اپنی ذمہ داریاں پوری کرے۔