آئی ایس او کے تحت جامعہ اردو میں یوم مصطفیٰ (ص) کا انعقاد، علمائے کرام کا خطاب

شیعہ نیوز (پاکستانی شیعہ خبر رساں ادارہ) جامعہ اردو گلشن کیمپس میں امامیہ اسٹوڈنٹس آرگنائزیشن پاکستان کراچی ڈویژن جامعہ اردو یونٹ کی جانب سے یوم مصطفی ﷺ کا انعقاد عبدالقدیر خان آڈیٹیوریم میں کیا گیا۔ جس میں طلبہ و طالبات نے بڑی تعداد میں شرکت کی۔ یوم مصطفیٰ میں موجود طلبہ و طالبات سے علامہ رضی حیدر زیدی، علامہ قاضی احمد نورانی صدیقی، علامہ مرزا یوسف حسین، علامہ محمد حسین رئیسی، پروفیسر زاہد علی زاہدی، علامہ نقی ہاشمی اور آئی ایس او پاکستان کراچی ڈویژن کے صدر محمد عباس نے خطاب کیا۔ یوم مصطفی ﷺ میں طلبہ و طالبات سے اپنے خطاب میں علامہ رضی حیدر زیدی نے کہا کہ رسول اللہ کی ذات تمام مسلمانوں کے لئے مثالِ راہ ہے۔ رسول اللہ کی تعلیمات پر عمل پیرا ہو کر انسان اپنی اصل منزلت تک رسائی ممکن بنا سکتا ہے۔ طلباء و طالبات رسول اللہ ﷺ کی تعلیمات پر غور و فکر کریں اور اپنی تحقیقی صلاحیتوں میں بہتری لائے۔ شرکا یوم مصطفیﷺ سے خطاب کرتے ہوئے علامہ مرزا یوسف حسین نے کہا کہ آج اس یوم کے انعقاد سے بات واضح ہوتی ہے کے نوجوان نسل اسلام اور عشق رسول (ص) سے لبریز ہے، ایک طرف دنیا بھر میں مسلمانوں پر اقتصادی اور ثقافتی یلغار ہے اور نوجوان نسل کو دین و اسلام سے دور کرنے کی بھر پور کوشش کی جارہی ہے، امریکہ و اسرائیل اپنی بھرپور کوشش کر رہے ہیں کہ نوجوان اسلام سے دور ہو جائیں، مگر دشمن اس بات سے لا علم ہے کہ ہمارے نوجوان، اسلام سے مربوط ہیں اور اسلام کی سربلندی کے لیے کوشاں ہیں۔ ان کا مزید کہنا تھا کہ امامیہ اسٹوڈنٹس آرگنائزیشن پاکستان کے نوجوانوں کو سلام پیش کرتا ہوں کہ وہ نوجوانوں کو اسلام سے قریب کرنے کے لیے عملی میدان میں موجود ہیں۔

یوم مصطفی (ص) سے خطاب کرتے ہوئے علامہ نقی ہاشمی کا کہنا تھا کہ آج پاکستان بالخصوص تعلیمی اداروں کو اسلام دشمن عناصر و پاکستان دشمن قوتوں نے اپنے نشانہ پر رکھا ہوا ہے، کبھی ہمارے تعلیمی اداروں میں غیر اسلامی اور غیر ملکی یوم منائے جاتے ہیں۔ طلباء کی اس بڑی تعداد کا یہاں موجود ہونا اس بات کی دلیل ہے کے مسلمان کل بھی عشق رسول (س) میں لبریز تھے اور آج بھی ہیں ان کا جینا مرنا سب اسلام اور نبی پاک (ص) کے لیے ہے۔ علامہ قاضی احمد نورانی صدیقی کا کہنا تھا کہ عشق رسول مسلمانوں میں وحدت اور اخوت کے جذبے کو پروان چڑھاتی ہے، تعلیمی اداروں میں نبی ﷺ کے عاشقوں کی موجودگی اس بات کی دلیل ہے کہ پاکستان میں شیعہ سنُی کا کوئی مسئلہ نہیں اور جو لوگ یہ سمجھتے ہیں کہ یہاں فرقہ واریت ہے وہ احمق ہیں۔ امامیہ اسٹوڈنٹس آرگنائزیشن پاکستان کراچی کے صدر محمد عباس کا کہنا تھا کہ یوم مصطفی (ص) کے انعقاد پر تمام طلبہ کو سلام پیش کرتا ہوں اور اساتذہ کرام کا مشکور ہوں جنہوں نے ہماری رہنمائی کی اور اس یوم کے انعقاد میں ہمارا ساتھ دیا۔ محمد عباس کا مزید کہنا تھا کہ آئی ایس او پاکستان کو یہ فخر حاصل ہے کہ ملک بھر کہ تعلیمی اداروں میں اسلام کی ترویج کے لیے سرگرم عمل ہے اور یوم مصطفی (ص) کا انعقاد بھی اسی سلسلہ کی ایک کڑی ہے، اس یوم کا انعقاد ایک طرف طلباء کو اسلام اور رسول گرامی (ص) کی ذات کے بارے میں تعلیم دینا اور تعلیمی اداروں میں غیر اسلامی سرگرمیوں کا خاتمہ کرنا ہے۔ محمد عباس نے مزید کہا کہ آج امریکہ اور اسرائیل ہماری نوجوان نسل کو تباہ کرنے کے لیے عمل پیرا ہیں۔