پانی و بجلی کے بحران، کرپشن اور قتل و غارتگری کی وجہ سے عوام کا جینا دوبھر ہوگیا ہے، علامہ شہنشاہ نقوی

شیعہ نیوز (پاکستانی شیعہ خبر رساں ادارہ) خطیب مسجد باب العلم علامہ شہنشاہ حسین نقوی نے کہا کہ حکومت اور منتخب نمائندے عوام کے بنیادی مسائل کے حل پر توجہ دیں، خصوصاً پانی و بجلی کا بحران، مہنگائی کا تسلسل، ٹریفک جام، کرپشن اور قتل و غارت گیری کی وجہ سے شہر کی عوام کا جینا دوبھر ہوگیا ہے لیکن افسوس کی بات یہ ہے کہ منتخب نمائندے اور حکومتی ذمہ داران اس پر توجہ نہیں دے پا رہے جو کہ ہماری بڑی بدقسمتی ہے۔ مسجد آل عباء گلبرگ میں منعقدہ اجتماع عام سے خطاب کے دوران انہوں نے کہا کہ عوام کی پریشانیاں دور ہوں اور وہ سکھ و چین کے ساتھ اپنی زندگیاں گزار سکیں، ہمیں اس طرف خصوصی توجہ دینا ہوگی کیونکہ عوام کی جان و مال کا تحفظ حکومت کی اولین ذمہ داری ہے جسے وہ نبھانے میں ناکام نظر آتی ہے۔ انہوں نے مزید کہا کہ ہم عوام کے حقوق کی جدوجہد کے حصول میں برابر کے شریک ہیں اور کوشش کررہے ہیں کہ پرامن طریقے سے عوام کی آواز اعلیٰ ایوانوں تک پہنچے۔ انہوں نے رمضان اور شب قدر کی فضیلتوں پر بھی تفصیلی روشنی ڈالی۔