ہم پاکستان کی نظریاتی و جغرافیائی سرحدوں کے محافظ ہیں، امامیہ چیف سکاؤٹ
شیعہ نیوز (پاکستانی شیعہ خبررساں ادارہ ) امامیہ اسٹوڈنٹس آرگنائزیشن پاکستان کے شعبہ اسکائوٹنگ کے چیف توقیر مہدی نے 14 اگست یوم آزادی پاکستان کے حوالے سے لاہور میں تقریب سے خطاب کرتے ہوئے کہا کہ آئی ایس او امسال بھی جشن آزادی جوش و خروش سے منائے گی اور ملک کے مختلف مقامات پر امامیہ اسکائوٹس پرچم کشائی کی تقریبات منعقد کریں گے، مذہب اسلام انسان کو آزادی و حریت کا درس دیتا ہے، اس درس آزادی سے ہمارے بزرگوں نے نظریہ اسلام کے تحت انگریزوں سے آزادی کی تحریک شروع کی، اس تحریک کو تقویت 23 مارچ 1940ء کو ملی، جب قرارداد پاکستان کو اکثریتی رائے سے پاس کیا گیا، یوں 14 اگست 1947ء کو ہمارے بزرگوں کو پاکستان جیسی عظیم نعمت کی شکل میں ایک الگ وطن نصیب ہوا۔ انہوں نے کہا کہ پاکستانی عوام نے ہمیشہ ظالمین کی مخالفت کی، چاہے وہ کشمیر میں بھارتی مظالم ہو یا فلسطین میں اسرائیلی جارحیت، پاکستانی عوام ہمیشہ سامراجی طاقتوں کے مخالف رہے ہیں۔
امامیہ چیف اسکائوٹ کا کہنا تھا کہ پاکستان کو 2 قومی نظریہ کی بنیاد پر حاصل کیا گیا اور اس کو بنانے میں ملت تشیع کا کردار واضح ہے، پاکستان میں آج ملت تشیع سمیت تمام محب وطن طبقات کو دہشت گردی کا نشانہ بنایا جا رہا ہے، اسلام اور ملک دشمن عناصر دہشت گردی کے لبادے میں چھپ کر محبان وطن کو اپنی بزدلانہ کارروائیوں کا نشانہ بنا رہے ہیں، ہم پاکستان کی نظریاتی و جغرافیائی سرحدوں کے محافظ ہیں، ہم دشمنان اسلام و پاکستان پر واضح کر دینا چاہتے ہیں کہ پاکستان بنانے والے پاکستان کی سلامتی و استحکام کے لئے اپنا کرادر ادا کرنا جانتے ہیں، آئی ایس او کا ہر جوان ملک کی نظریاتی و جغرافیائی سرحدوں کی محافظت کیلئے ہمہ وقت تیار ہے، پاکستان اسلام کا قلعہ ہے، اس کی حفاظت کیلئے اپنی جان کی قربانی سے بھی دریغ نہیں کریں گے۔
