ایم ڈبلیو ایم کی طرف سے نجف حسین اور کاشف حسین کے قتل کی شدید مذمت

شیعہ نیوز (پاکستانی شیعہ خبر رساں ادارہ) مجلس وحدت مسلمین کے مرکزی رہنما علامہ اصغر عسکری، ایم ڈبلیو ایم ضلع راولپنڈی کے سیکرٹری جنرل علامہ ساجد شیرازی اور علامہ علی اکبر کاظمی نے راولپنڈی میں سید نجف حسین شاہ اور کاشف حسین کو قتل کیے جانے کے واقعہ پر گہری تشویش اور افسوس کا اظہار کرتے ہوئے کہا ہے کہ ان واقعات کے محرکات جاننے کے لیے فوری طور پر پولیس انتظامیہ کی طرف سے انکوائری کمیٹی تشکیل دی جائے کہ آیا یہ واقعہ کسی ذاتی رنجش کا نتیجہ ہے یا پھر شیعہ نوجوانوں کو منظم طور پر ٹارگٹ کلنگ کا نشانہ بنایا گیا ہے۔ انہوں نے کہا کہ کہیں محرم سے قبل راولپنڈی میں پھر کسی نئی سازش کو پروان چڑھانے کی کوشش تو نہیں کی جا رہی۔ پنجاب بھر میں شیعہ بے گناہ افراد کی گرفتاریوں کا نہ ختم ہونے والا سلسلہ پنجاب حکومت کے خلاف غصے اور نفرت میں اضافے کا باعث بن رہا ہے۔ ایک طرف نیشنل ایکشن پلان کے نام پر بے گناہ افراد کو گرفتار کیا جا رہا ہے اور دوسری طرف دہشت گرد عناصر دندناتے پھر رہے ہیں۔ انہوں نے کہا راولپنڈی میں محرم الحرام میں سیکورٹی کو موثر بنانے کے لیے ضروری ہے کہ ماہ مقدس سے قبل پورے شہر کا ایک بھرپور آپریشن کیا جائے۔ راولپنڈی کے بہت سارے علاقوں میں دہشت گردوں نے محفوظ پناہ گاہیں بنا رکھی ہیں۔ ان تمام عناصر کو فوری گرفتار کیا جائے جو دہشت گردوں کو کسی بھی قسم کی معاونت فراہم کرتے ہیں۔