لاہور، گرین ٹاؤن میں قدیمی جلوس برآمد، سینکڑوں عزاداروں کی شرکت

شیعہ نیوز (پاکستانی شیعہ خبر رساں ادارہ) امام بارگاہ گلستان زہرا گرین ٹاؤن لاہور میں قدیمی جلوس عزا برآمد ہوا جس میں سینکڑوں عزاداروں نے ماتم اور نوحہ خوانی کر کے نواسہ رسولؑ کو پرسہ دیا۔ مجلس عزا میں مختلف علما و ذاکرین نے خطاب کیا۔ مجلس عزا کے اختتام پر شبیہ علم مبارک حضرت غازی عباس علمدار علیہ السلام اور گہوارہ حضرت علی اصغر برآمد ہوا۔ جلوس عزا میں سینکڑوں عزاداروں نے شرکت کر کے امام عالی مقام حضرت امام حسین علیہ السلام اور شہدائے کربلا کو پرسہ دیا۔ اس موقع پر عزاداروں نے نوحہ خوانی اور ماتم داری کی۔ جلوس عزا میں بچوں سمیت خواتین نے بھی شرکت کی۔ جلوس اپنے مقررہ راستوں سے ہوتا ہوا واپس امام بارگاہ گلستان زہرا میں اختتام پذیر ہو گیا۔ اس موقع پر سیکیورٹی کے سخت انتظامات کئے گئے تھے۔ خاردار تاروں سے جلوس کے داخلی راستوں کو بند کیا گیا تھا جبکہ انتظامیہ کی جانب سے واک تھرو گیٹ بھی لگائے گئے تھے جہاں جلوس میں شرکت کرنیوالوں کی جامہ تلاشی کے بعد انہیں داخلے کی اجازت دی گئی۔