امام حسین کربلا میں احترام آدمیت کیلئے طاغوت کے سامنے صف آراء ہوئے، عشرت العباد

شیعہ نیوز (پاکستانی شیعہ خبر رساں ادارہ) گورنر سندھ ڈاکٹر عشرت العباد نے کہا ہے کہ امام حسین کی عظیم قربانی ساری انسانیت کے لئے عظمت کی ایک اعلیٰ مثال ہے، امام عالی مرتبت کربلا میں جس طرح طاغوت کے سامنے صف آراء ہوئے، اسلام اور احترام آدمیت کے اعلیٰ و ارفع اصولوں کی پاسداری کے لئے نہ صرف اپنی بلکہ اپنے اہل و عیال کی قیمتی جانوں کی بھی پروا نہ کی، وہ رہتی دنیا تک با اصول انسانوں کے لئے مشعل راہ ہے۔ واقعہ کربلا اسلامی تاریخ کا روشن باب ہے جو ہمیں معاشرے میں نظم و ضبط قائم کرنے اور صبر و استقامت کے ساتھ غیر اللہ کی قوتوں کا مقابلہ کرنے اور ایثار و قربانی کا جذبہ بیدار کرنے کا درس دیتا ہے۔ آج کا دن ہمیں اپنے طرز عمل اور رویوں پر غور کرنے کی دعوت دیتا ہے۔ آئیے یوم عاشور کے موقع پر ہم یہ عہد کریں کہ ہم سیدنا امام حسین کے نقش قدم پر چلتے ہوئے ہر قسم کے باطل نظریات کے خلاف متحد ہوکر اسلام کی سربلندی کے لئے ہر ممکن قربانی دیں گے اور شہدائے کربلا کے طریقہ کار کو اپنا کر عملی طور پر پاکباز شہیدوں سے اپنا رشتہ استوار کریں گے کہ یہی طرز عمل ہماری دینی اور دنیاوی زندگی میں سرخرو ہونے کا ذریعہ ہے۔