شہدائے پشاور کو خراج عقیدت پیش کرنے کے لیے نیا نغمہ ریلیز

شیعہ نیوز (پاکستانی شیعہ خبر رساں ادارہ) پاک فوج کے شعبہ تعلقات عامہ (آئی ایس پی آر) نے سانحہ پشاور کو ایک سال مکمل ہونے پر ہولناک سانحے میں ہلاک ہونے والے بچوں کو خراج عقیدت پیش کرنے کے لیے نیا نغمہ ریلیز کردیا۔’مجھے دشمن کے بچوں کو پڑھانا ہے‘ کے عنوان سے جاری ہونے والے نغمے کی شاعری اور موسیقی نے پورے پاکستانی عوام بالخصوص سکول میں پڑھنے والے طالب علموں کو نئے جذبے سے سرشار کردیا ہے۔نغمے میں سکول پر حملہ کرنے والے دہشت گردوں کو مخاطب کرتے ہوئے ان سے انوکھا انتقام لینے کا پیغام دیا گیا ہے۔
نغمے میں ننھا بچہ اپنی مدھر اور سریلی آواز میں دہشت گردوں کو پیغام دے رہا ہے کہ میں تمہیں مار کر نہیں بلکہ تمہارے بچوں کو پڑھا کر اور انہیں شعور دے کر بدلہ لوں گا، کیونکہ تم جیسے بھٹکے ہوئے لوگوں سے یہی سب سے بہترین انتقام ہوگا۔وہ جس بچپن نے تھوڑا اور جینا تھا، وہ جس نے ماں تمہارا خواب چھینا تھا، مجھے ماں اس سے بدلہ لینے جانا ہے، مجھے دشمن کے بچوں کو پڑھانا ہے۔جذبات سے بھرپور نغمے میں سانحے میں ہلاک ہونے والے بچوں کے والدین کا بلند حوصلہ بھی دکھایا گیا ہے، جو اپنے ایک بیٹے کو کھونے کے باجود اپنے دوسرے بیٹے کو اسی سکول میں تعلیم دلوانے کے لیے پرعزم ہیں۔ساتھ ہی اس بھائی کی فریاد اور اس کے حوصلے کو بھی واضح طور پر دیکھا جاسکتا ہے جو دوست جیسے بھائی کے گزر جانے کے بعد بھی تعلیم حاصل کرکے کچھ بننے کے لیے مسلسل جدو جہد کر رہا ہے اور ساتھ ہی دہشت گردوں کو بتا رہا ہے کہ وہ اس کے حوصلے پست نہیں کرسکتے۔
واضح رہے سانحہ آرمی سکول کے بعد بھی آئی ایس پی آر کی جانب سے ’بڑا دشمن بنا پھرتا ہے‘ کے عنوان سے نغمہ ریلیز کیا گیا تھا۔خیال رہے کہ گزشتہ سال 16 دسمبر کو پشاور کے آرمی پبلک سکول پر دہشت گردوں کے ہولناک حملے میں 130 سے زائد بچوں سمیت 144 افراد شہید ہوگئے تھے۔