سندھ کے ضلع جامشورو میں بم بنانے کی فیکٹری پکڑی گئ

شیعہ نیوز (پاکستانی شیعہ خبر رساں ادارہ)کاؤنٹر ٹیررازم ڈیپارٹمنٹ نے جامشورو میں بم بنانے کی فیکٹری پکڑنے کا دعویٰ کیا ہے، جس میں موجود تکفیری دہشتگرد کراچی میں تخریب کاری کا منصوبہ بنا رہے تھے۔ تفصیلات کے مطابق کاؤنٹر ٹیرارزم ڈیپارٹمنٹ (سی ٹی ڈی) لاڑکانہ نے جامشورو میں کارروائی کرتے ہوئے ایک فیکٹری پر چھاپہ مارا، جس میں بم بنانے کا انکشاف ہوا ہے، جبکہ فیکٹری میں موجود تکفیری دہشتگردوں کو بھی گرفتار کرلیا گیا ہے۔ سی ٹی ڈی حکام کے مطابق فیکٹری پر چھاپہ خفیہ اطلاع پر مارا گیا، جہاں سے دھماکا خیز مواد برآمد کیا گیا، جبکہ فیکٹری میں بم بھی بنائے جاتے ہیں۔ سی ٹی ڈی حکام کا کہنا ہے کہ فیکٹری سے بڑی تعداد میں بم بنانے کے آلات اور 100 کلوگرام آر ڈی ایکس برآمد ہوا ہے، جبکہ حراست میں لئے گئے افراد سے ابتدائی تفتیش میں اس بات کا بھی انکشاف ہوا ہے کہ تکفیری دہشتگرد پورے سندھ اور خصوصاً کراچی میں بڑے پیمانے پر بدامنی کا منصوبہ بنا چکے تھے، اور عنقریب اپنے منصوبے کو عملی جامہ پہنانے کے قریب تھے۔ سی ٹی ڈی حکام کے مطابق حراست میں لئے گئے تکفیری دہشتگردوں کی نشاندہی پر ان کے دیگر ساتھیوں کی گرفتاری کیلئے بھی چھاپے مارے جا رہے ہیں