آیت اللہ شیخ باقر نمر کی سزائے موت کے خلاف آئی ایس او کراچی کی احتجاجی ریلی

شیعہ نیوز (پاکستانی شیعہ خبر رساں ادارہ) امامیہ اسٹوڈنٹس آرگنائزیشن پاکستان کراچی ڈویژن کی جانب سے سعودی عرب میں شیخ باقر النمر کی سزائے موت کے خلاف احتجاجی ریلی کا انعقاد بعد نماز مغربین مسجد و امام بارگاہ شاہ خراشان تا نمائش چورنگی تک کیا گیا۔ ریلی میں خواتین و بچوں سمیت شرکاء کی ایک بڑی تعداد نے شرکت کی۔ شرکائے ریلی نے اپنے ہاتھوں میں شیخ باقر النمرکی تصویریں، بینرز اور پلے کارڈ اٹھائے ہوئے تھے۔ جس میں شیخ باقر النمر کی سزائے موت کے خلاف نعرے درج تھے۔ شرکائے ریلی سے آئی ایس او کراچی ڈویژن کے صدر یاور عباس، مجلس وحدت مسلمین کے رہنما علامہ مبشر حسن، پاکستان عوامی تحریک کراچی کے صدر سید علی اوسط، مولانا صادق رضا تقوی، مولانا منور نقوی و دیگر نے خطاب کیا۔ اس موقع پر شرکاء سے اپنے خطاب میں آئی ایس او کراچی ڈویژن کے صدر یاور عباس کا کہنا تھا کہ شیخ باقر النمر کو حق گوئی کے جرم کی سزا دی گئی، سعودی عرب میں آزادی اظہار رائے پر عائد پابندی پر انسانی حقوق کی تنظیموں اور عالمی برداری نے مجرمانہ خاموشی اختیار کی ہوئی ہے جبکہ اقوام متحدہ اور اس کے ماتحت ادارے سعودی عرب میں انسانی حقوق کی پامالی رکوانے میں ناکام نظر آ رہے ہیں۔ ان کا مزید کہنا تھا کہ آل سعود اپنے طرز حکمرانی پر تنقید کرنے والی ہر آواز کو دبانا چاہتے ہیں۔

مجلس وحدت مسلمین کے رہنماء علامہ مبشر حسن نے کہا کہ آل سعود اور عرب حکمرانوں کی بادشاہت کا تختہ الٹنے کے دن گنے جا چکے ہیں، الحمد اللہ امت مسلمہ بیدار ہے، شیخ باقر النمر کی شہادت سے خطہ میں بیداری کی تحریک کا آغاز ہوگیا ہے، خادمین الحرمین شریفین آل سعود کا بدنما چہرہ کھل کر سامنے آگیا ہے، باقر النمر سعودی عرب میں ایک جید عالم دین کی حیثیت سے پہچانے جاتے تھے، آل سعود کی جانب سے منظم پلاننگ کے تحت شیخ باقر النمر پر جھوٹے مقدمات قائم کر کے انہیں گرفتار کیا گیا اور اب اچانک ان کا سر قلم کردیا گیا۔ علامہ مبشر حسن نے انسانی حقوق کی تنظیموں اور عالمی ادارہ انصاف سے مطالبہ کیا کہ وہ سعودی حکومت کی جانب سے شیخ باقر النمر کی شہادت کا نوٹس لیں۔ اس موقع پر صدر پاکستان عوامی تحریک کراچی علی اوسط کا کہنا تھا کہ سعودی حکمران اپنی کوتاہیاں چھپانے کے لئے ظلم و ستم کا سہارا لے رہے ہیں، شیخ باقر النمر حق و صداقت کی آواز تھے، ان کی سزائے موت آزادی اظہار رائے کا قتل ہے، شیخ النمر کے معاملے میں اقوام متحدہ اور آزادی اظہار رائے کے علمدار مغربی ممالک کے کردار پر بھی سوالیہ نشان اٹھاتے ہیں۔ اس موقع پر مولانا صادق تقوی، مولانا منور نقوی و دیگر نے بھی خطاب کیا۔