سانحہ چارسدہ کا مقدمہ ہلاک دہشت گردوں کے خلاف درج

شیعہ نیوز (پاکستانی شیعہ خبر رساں ادارہ)خیبر پختونخوا میں چارسدہ کی باچا خان یونیورسٹی پرتکفیری دہشت گردوں کے حملے کا مقدمہ درج کر لیا گیا جبکہ زخمیوں میں سے ایک اور شخص کے دم توڑ جانے کے بعد ہلاک افراد کی تعداد میں بھی اضافہ ہو گیا. دوسری جانب ملک کے مختلف شہروں میں سانحہ چارسدہ کے خلاف احتجاج کیا جا رہا ہے۔ باچا خان یونیورسٹی پر تکفیری دہشت گردوں کے حملے کا مقدمہ محکمہ انسداد دہشت گردی مردان ریجن میں درج کیا گیا۔ مقدمہ تھانہ سرڈھیری کے ایس ایچ او کی مدعیت میں دہشت گردی کی دفعات کے تحت درج کیا گیا، جس میں مارے گئے4 تکفیری دہشت گردوں کو نامزد کیا گیا۔

ایف آئی آر کے مطابق گشت کے دوران باچاخان یونیورسٹی پرتکفیری دہشت گردوں کے حملے کی اطلاع ایس ایچ او کو دی گئی جس پر بھاری نفری موقع پر پہنچ گئی جبکہ سیکیورٹی فورسز کو بھی طلب کیا گیا۔ رپورٹ کے مطابق واقعے میں تمام تکفیری دہشت گرد جن کی تعداد 4 تھی، مارے گئے جبکہ ایک پولیس اہلکار بھی دوران مقابلہ زخمی ہوا۔ ایف آئی آر میں کہا گیا ہے کہ ہلاک ہونے والے تکفیری دہشت گردوں کے قبضے سے 4 کلاشنکوف، 16میگزین، 240 کارتوس بھی قبضے میں لیے گئے۔ واضح رہے کہ گزشتہ روز اس حملے کی ذمہ داری طالبان کے ایک گروہ طالبان گیدڑ گروپ نے قبول کرنے کا دعویٰ کیا تھا، تاہم ایف آئی آر میں اس گروپ یا اس کے لیڈر کو نامزد نہیں کیا گیا