ایرانی سفیر مہدی کا لاہور پریس کلب کا دورہ، نائب صدر سے ملاقات
شیعہ نیوز (پاکستانی شیعہ خبر رساں ادارہ ) ایرانی سفیر مہدی ہنردوست کا کہنا ہے کہ پاک ایران گیس پائپ لائن منصوبے پر اب صرف پاکستان کی طرف سے کام باقی ہے۔
زرائع کے مطابق ان خیالات کا اظہار پاکستان میں تعینات ایرانی سفیر مہدی ہنر دوست نے لاہور میں ایرانی قونصل جنرل حسین بنی اسدی کے ہمراہ لاہور پریس کلب کے دورہ کے موقع پر میڈیا سے بات کرتے ہوئے کیا۔ لاہور پریس کلب آمد پر نائب صدر عبدالمجید ساجد نے اپنے وفد کے ہمراہ معزز مہمانوں کا استقبال کیا اور انھیں پھولوں کا گلدستہ بھی پیش کیا۔نائب صدر لاہور پریس کلب عبدالمجید ساجد نے ایرانی وفد کو کلب سے متعلق بریفنگ دی۔
میڈیا کے نمائندوں سے بات کرتے ہوئے ایرانی سفیر مہدی ہنر دوست نے کہا کہ پاک ایران گیس پائپ لائن منصوبے کو جلد مکمل کرنے کیلئے اعلیٰ سیاسی قیادت کے فیصلوں کو اہمیت دینا ہوگی، ایران نے نوے فیصد پائپ لائن بچھا دی ہے، باقی کام پاکستان کا ہے۔ اُن کا کہنا تھا کہ ایران پاکستان کیساتھ تجارتی تعلقات کو مضبوط کرنا چاہتا ہے۔ ایرانی سفیر کا کہنا تھا کہ پاکستان کیساتھ ثقافتی تعلقات کو فروغ دینے کیلئے جلد ہی یہاں ایرانی فلموں کی نمائش کی جائے گی اور لاہور پریس کلب کیساتھ صحافیوں کے تبادلوں پر بھی جلد معاہدہ کیا جائے گا۔ اُن کا کہنا تھا کہ فارسی زبان کی ترویج کیلئے لاہور میں سینٹرز قائم کیے گئے ہیں بعدازاں نائب صدر لاہور پریس کلب عبدالمجید ساجد نے ایرانی سفیر کو اعزازی شیلڈ بھی پیش کی۔
