حضرت علی ؑکیلئے دیوار کعبہ کا شق ہونا تاریخ کا پہلا اور آخری واقعہ ہے، نیاز نقوی
شیعہ نیوز (پاکستانی شیعہ خبر رساں ادارہ ) امیر المومنین حضرت علی علیہ السلام کی ولادت کیلئے خانہ کعبہ کی دیوار کا شق ہونا تاریخ انسانی کا پہلا اور آخری واقعہ ہے، آرمی چیف کا کرپشن پر فوجی افسران کو برطرف کرنا قابل تعریف ہے، حکومت میں شامل لوگ بھی پیروی کرتے ہوئے خود کو احتساب کیلئے پیش کریں۔
زرائع کے مطابق ان خیالات کا اظہار وفاق المدارس الشیعہ پاکستان اور ملی یکجہتی کونسل کے مرکزی نائب صدر قاضی علامہ نیاز حسین نقوی نے علی مسجد جامعتہ المنتظر لاہور میں خطبہ جمعہ دیتے ہوئے کیا۔علامہ نیاز حسین نقوی نے کہا کہ جانشین رسول، امیرالمومنین حضرت علی علیہ السلام کی پیدائش پر اللہ تعالیٰ نے اپنے قوانین تبدیل کئے، دیوار کعبہ علی علیہ السلام کی والدہ ماجدہ کی دعا سے شق ہوئی، جوکہ تاریخ کا پہلا اور آخری واقعہ ہے۔ ان کا کہنا تھا کہ پیغمبر گرامی قدر حضرت محمد مصطفی صلی اللہ علیہ وآلہٰ وسلم کے بعد امیرالمومنین علی علیہ السلام تمام انبیاعلیہم السلام اور رسولوں سے فضیلت رکھتے ہیں، ان صفات اور عظمتوں کا بیان انسان کے بس کی بات نہیں۔
علامہ نیاز نقوی نے کہا کہ آرمی چیف جنرل راحیل شریف نے کرپشن پر فوجی افسران کو برطرف کرکے گھر سے احتساب کا عمل شروع کرنا قابل تعریف ہے، حکومت کو ان کی پیروی کرتے ہوئے خود کو احتساب کیلئے پیش کرنا چاہیے۔ انہوں نے کہا کہ پانامہ لیکس ملک پر بدنما داغ ہے، تحقیقات کے بعد ذمہ داروں کے خلاف کارروائی ہونی چاہیے۔
