نجی جہادی لشکروں نے ریاست کی اینٹ سے اینٹ بجا دی ہے، علامہ سبطین سبزواری
شیعہ نیوز (پاکستانی شیعہ خبر رساں ادارہ) شیعہ علماء کونسل پنجاب اور اسلامی تحریک کے صوبائی صدر علامہ سید سبطین حیدر سبزواری نے امریکی کانگریس کی طرف سے پاکستان کو ایف 16 طیاروں کی فروخت اور دہشتگردی کیخلاف عالمی جنگ کی فوجی امداد سے انکار کی مذمت کرتے ہوئے کہا ہے کہ امریکہ نے ہمیشہ دھوکہ دیا ہے مگر ہمارے حکمران واشنگٹن کی کاسہ لیسی اور غلامی سے باز نہیں آتے۔ لاہور میں میڈیا سے گفتگو میں علامہ سبطین سبزواری نے کہا کہ امریکہ سے کسی خیر کی توقع نہیں، تاریخ گواہ ہے کہ اس نے پاکستان کو ہمیشہ دھوکہ دیا ہے۔ انہوں نے کہا کہ حکمران طبقے کو خود انحصاری کی پالیسی پر عمل پیرا ہوکر امریکی غلامی کے چنگل ے نکلنا چاہیے، دہشتگردی کیخلاف جنگ کیلئے طیارے پاکستان کی دفاعی ضرورت ہیں اور اسی حوالے سے اس پر اتفاق کیا گیا تھا مگر بھارت سے امریکی دوستی واضح ہوگئی ہے کہ اسے پاکستان سے دوستی کی ضرورت نہیں، بھارتی لالچ کا احترام ہے، جو اسلام دشمنی میں اسرائیل کی طرح امریکہ کا ساتھی ہے۔
ان کا کہنا تھا کہ امریکہ کی افغانستان میں جنگ میں پاکستان کا بھاری جانی اور مالی نقصان ہوا، نجی جہادی لشکروں نے ریاست کی اینٹ سے اینٹ بجا دی، ہماری فوج اور پولیس کے نوجوانوں کی شہادتوں کیساتھ مساجد، امام بارگاہوں، خانقاہوں، گرجا گھروں، عید میلادالنبی اور عزاداری کے جلوسوں، تعلیمی اداروں اور مارکیٹوں کو خودکش حملوں کا نشانہ بنایا گیا۔ اسی بنیاد پر عالمی برادری جو امداد پاکستان کو دہشتگردی کیخلاف دے رہی تھی۔ اس سے انکار نے امریکہ کی دشمنی کو ایک بار پھر بے نقاب کر دیا ہے، اس سے اب حکمرانوں کی آنکھیں بھی کھل جانی چاہیں کہ دوسروں کی جنگ میں پھنسنے کی بجائے، ہمیں اپنے فیصلے خود اسلام آباد میں کرنے چاہیں، واشنگٹن کے اشاروں پر چلنے سے انکار کردیں، یہ باوقار انداز ہوگا۔
