عمران خان کا نیا پاکستان دہشتگردی سے پاک ہونا چاہیئے، علامہ مقصود ڈومکی
شیعہ نیوز (پاکستانی شیعہ خبر رساں ادارہ )مجلس وحدت مسلمین بلوچستان کے سربراہ علامہ مقصود علی ڈومکی نے ڈی آئی خان میں معصوم انسانوں کی شہادت کو المناک قرار دیتے ہوئے کہا ہے کہ دہشت گردی کے خاتمے کے تمام تر دعووں کے باوجود آج بھی ملک کے گلی کوچوں میں قاتل دہشت گرد دندناتے پھر رہے ہیں۔
زرائع کے مطابق ان خیالات کا اظہار مجلس وحدت مسلمین پاکستان بلوچستان کے سیکڑیٹری جنرل علامہ مقصود ڈومکی نے صوبائی سیکریٹریٹ سے جاری ہونے والے اپنے ایک بیان میں کیا۔علامہ مقصود ڈومکی کا کہنا تھا کہ عمران خان کا نیا پاکستان دہشت گردی سے پاک ہونا چاہیئے، پی ٹی آئی کی صوبائی حکومت شیعہ وکلاء، ٹیچرز و زعماء کے قتل عام کا سلسلہ روکے۔ ملک سے دہشت گردی کا خاتمہ ضروری ہے، جبکہ ملکی سیاسی جماعتوں کو چاہئے کہ وہ ملک و قوم کو دہشت گردی اور کرپشن سے نجات دلائیں۔ کرپشن اور دہشت گردی نے دیمک کی طرح ملکی بنیادوں کو کھوکھلا کردیا ہے۔
علامہ مقصود ڈومکی نےآرمی چیف کی جانب سے گیارہ تکفیری دہشت گردوں کی سزائے موت کی توثیق کو خوش آیند قرار دیتے ہوئے کہا کہ بلوچستان کے وارثان شہداء اور کوئٹہ کے مظلوم ہزارہ عوام یہ سوال پوچھتے ہیں کہ سینکڑوں معصوم انسانوں کے قاتل ہمارے قاتلوں کو کب پھانسی ہوگی؟۔ کیونکہ وارثان شہداء آج بھی انصاف کے منتظر ہیں۔ انہوں نے کہا کہ مجلس وحدت مسلمین معاشرے کے مظلوم اور ستمدیدہ عوام کے حقوق کی جنگ لڑ رہی ہے، ملکی اور عالمی سطح پر انسان دشمن اور عوام دشمن سامراجی قوتوں کے خلاف ہم میدان عمل میں ہیں۔ عوام کرپشن اور دہشت گردی کے خاتمہ اور متبادل صالح قیادت کے سلسلے میں ہمارا ساتھ دیں۔
