سندھ پولیس میں سیاسی مداخلت،چیف جسٹس آف پاکستان کا ازخود نوٹس
شیعہ نیوز ( پاکستانی شیعہ خبر رساں ادارہ )چیف جسٹس آف پاکستان جسٹس انور ظہیر جمالی نے صوبائی انتظامیہ کی جانب سے سندھ پولیس میں مبینہ طور پر سیاسی مداخلت کا ازخود نوٹس لے لیا۔
زرائع کے مطابق چیف جسٹس نے معاملے پر ازخود نوٹس لیتے ہوئے چیف سیکریٹری سندھ، سیکریٹری داخلہ اور آئی جی سندھ پولیس کو 4 جولائی کو عدالت پیش ہوکر اپنا موقف پیش کرنے کا حکم دیا۔جسٹس انور ظہیر جمالی نے حکام سے، چیف جسٹس سندھ ہائی کورٹ کے بیٹے بیرسٹر اویس شاہ کے اغوا کے بعد سینئر سپرنٹندنٹ (ایس پی) ساؤتھ ڈاکٹر فاروق احمد کے تبادلے کے حوالے سے بھی وضاحت طلب کرلی۔
واضح رہے کہ چیف جسٹس نے اویس شاہ کے اغوا کے بعد کراچی میں مختلف حکام سے الگ، الگ ملاقاتوں میں انہیں اویس شاہ کی بازیابی کے لیے موثر اور ٹھوس اقدامات اٹھانے کی ہدایت کی تھی۔
بیرسٹر اویس شاہ کو رواں ماہ کلفٹن کے علاقے سے اغوا کیا گیا تھا، جس کے بعد پولیس نے ان کے اغوا کو تکفیری دہشتگردوں کی رہائی کے لیے ’بارگیننگ چِپ‘ قرار دیا تھا۔ اویس شاہ کے اغوا کے چند روز بعد ہی کراچی کے علاقے لیاقت آباد میں عالمی شہرت یافتہ منقبت خواں،نعت خواں،قوال امجد صابری کی تکفیری دہشتگردوں کے ہاتھوں المناک شھادت بھی واقعہ پیش آیا، جس کی ذمہ داری ملک دشمن، اسلام دشمن کالعدم تکفیری دہشتگرد گروہ تحریک طالبان پاکستان (ٹی ٹی پی) نے قبول کی تھی۔
دونوں واقعات کے بعد کراچی میںملک دشمن، اسلام دشمن تکفیری دہشت گردوں کے خلاف جاری آپریشن کے حوالے سے سوال اٹھائے گئے تھے۔
