شہید قائد حسینی کی آواز پاکستان میں عالمی استعمار و طاغوت کے خلاف جرات مندانہ للکار تھی، میثم عابدی
شیعہ نیوز ( پاکستانی شیعہ خبر رساں ادارہ )مجلس وحدت مسلمین پاکستان کے زیر اہتمام 7 اگست کو اسلام آباد میں شہید قائد شہید عارف حسین الحسینی کی برسی کے موقع پر تاریخی قومی اجتماع کے حوالے سے ملک بھر کی طرح کراچی میں بھی بھرپور عوامی رابطہ مہم کا آغاز کر دیا ہے۔
زرائع کے مطابق مجلس وحدت مسلمین پاکستان کراچی ڈویژن کی جانب سے اسلام آباد میں 7 اگست کو ہونے والے تاریخی قومی اجتماع کے حوالے سے شہر کے مختلف علاقوں میں عوامی رابطہ مہم کے سلسلے میں کارنر میٹنگز اور اجلاس منعقد کئے گئے، جن سے سیکریٹری جنرل کراچی میثم عابدی، مولانا نشان حیدر ساجدی، مولانا علی انور جعفری، علامہ مبشر حسن، مولانا صادق جعفری و دیگر نے خطاب کیا۔ اپنے خطاب میں مقررین نے 7 اگست کو اسلام آباد میں منعقد ہونے والے تاریخی قومی اجتماع بمناسبت برسی شہید قائد عارف حسین الحسینی پر تفصیلی گفتگو کی۔ انہوں نے بتایا کہ اسلام آباد میں منعقدہ قومی اجتماع میں کراچی سے بھی ہزاروں کی تعداد کارکنان و عوام شریک ہونگے، یہ قومی اجتماع اسلام آباد کی تاریخ کا سب سے بڑا اجتماع ثابت ہوگا۔
مجلس وحدت مسلمین پاکستان کراچی ڈویژن کے سیکریٹری جنرل میثم عابدی کا کہنا تھا کہ 7 اگست کا قومی اجتماع ملک سے دہشت گردی اور تکفیریت کے خاتمے کے حوالے اہم سنگ میل ثابت ہوگا، قومی اجتماع میں ملک بھر سے شریک ہونے والے لاکھوں مرد و خواتین ملک کو حقیقی معنوں میں قائد و اقبال کا پاکستان بنانے کیلئے شہید قائد علامہ عارف حسین الحسینی سے تجدید عہد کرینگے۔ رہنماؤں نے کہا کہ علامہ عارف حسینی کی آواز پاکستان میں عالمی استعمار و طاغوت اور نئے نمک خوار ایجنٹوں کے خلاف جرات مندانہ للکار تھی، ہم بھی اپنے اس عظیم قائد کے مشن کو پوری ذمہ داری کے ساتھ آگے بڑھاتے ہوئے اس پر گامزن رہیں گے۔ انہوں نے تاکید کی کہ علامہ عارف حسینی وحدت و اخوت کے حقیقی داعی تھے، آپ ملک میں شیعہ سنی اتحاد و اخوت کے داعی تھے، جس کی خاطر آپ نے اپنی جان کا نذرانہ دینے سے بھی دریغ نہیں کیا، آپ کی ساری زندگی اسلام کی سربلندی اور وطن عزیز کے استحکام کی جدوجہد میں گزری۔
عوامی رابطہ مہم کی مناسبت سے منعقد ہونے والے اجتماعات سے خطاب کرتے ہوئے مجلس وحدت مسلمین پاکستان کراچی ڈویژن کے رہنماؤں کا کہنا تھا کہ اگر نواز حکومت نے ہوش کے ناخن نہ لئے اور دہشت گردی کی سرپرستی اور حمایت پر مبنی پالیسیاں ختم نہیں کیں تو نواز حکومت کو تاریخ کا حصہ بنا دیا جائیگا۔ کراچی سمیت سندھ بھر سے بڑی تعداد میں کارکنان و عوام کی شرکت کے پیش نظر ایم ڈبلیو ایم نے انتظامی حوالے سے مختلف کمیٹیاں تشکیل دے دی ہیں اور سندھ حکومت سے مطالبہ کیا ہے کہ کراچی سمیت سندھ بھر سے جانے والے قافلوں کی سیکورٹی کیلئے فول پروف انتظامات کو یقینی بنایا جائے۔
