کراچی، حالات میں بہتری کیلئے پولیس نفری بڑھانے کی ضرورت ہے، آئی جی سندھ

شیعہ نیوز ( پاکستانی شیعہ خبر رساں ادارہ) سندھ پولیس کے انسپکٹر جنرل اے ڈی خواجہ نے کہا ہے کہ کراچی کے حالات میں بہتری کے لئے پولیس نفری بڑھانے کی ضرورت ہے، اگلے 6 ماہ میں پولیس اسٹیشنوں میں استقبالیہ کاونٹر قائم کر دیے جائیں گے، دہشتگردوں کو کیفرکردار تک پہنچانے کے لئے عوام کا تعاون بہت ضروری ہے۔

زرائع کے مطابق کراچی چیمبر میں موجود صنعتکاروں سے گفتگو کرتے ہوئے آئی جی سندھ کا کہنا تھا کہ بھتہ خوری کی شکایات موصول ہو رہی ہیں، جس کے لئے زیادہ تر فون کالز افغانستان اور ایران سے موصول ہو رہی ہیں۔ مسئلے سے جلد نمٹنے کے لئے آرمی چیف سے بات کی ہے۔ اے ڈی خواجہ کا کہنا تھا کہ 2013 سے اب تک 80 ہزار ملزمان پکڑے جا چکے ہیں، اگر عوام ساتھ دیں اور گواہی دیں، تو مجرموں کو سزا ہو جائے گی۔ بدقسمتی سے ماضی میں کیے گئے آپریشن کے بعد پولیس افسران کو چن چن کر شہید کیا گیا۔ آئی جی سندھ کا کہنا تھا کہ سی پی ایل سی کے مطابق شہر میں موبائل چھینے کی وارداتوں میں 24 فیصد کمی آئی ہے۔ اگلے تین ماہ میں کراچی میں بہترین کیمرے نصب کر دیے جائیں گے جبکہ 6 ماہ میں کراچی بھر کے تھانوں میں استقبالیہ کاونٹر بھی قائم کیا جائے گا، جہاں عوامی نمائندگان بھی بیٹھا کریں گے۔ دوسری جانب حالات میں مزید بہتری کیلئے پولیس میں نئی بھرتیوں کے لئے وزیر اعلیٰ سندھ مراد علی شاہ سے سفارش بھی کی ہے۔