ملتان، امام علی رضا علیہ السلام کی ولادت کے موقع پر خانہ فرہنگ میں جشن کی تقریب، نمائش کا اہتمام

شیعہ نیوز ( پاکستانی شیعہ خبر رساں ادارہ ) امام ہشتم حضرت علی ابن موسٰی الرضا علیہ السلام کے یوم ولادت کے موقع پر خانہ فرہنگ اسلامی جمہوریہ ایران ملتان میں جشن کا اہتمام کیا گیا۔ جشن کی تقریب سے علامہ سید مجاہد عباس گردیزی نے خطاب کیا، جبکہ جشن میں مولانا غلام مصطفٰی خان، مولانا ہادی حسین ہادی، مولانا غلام جعفر انصاری، مخدوم زاہد حسین شمسی، سابق صدر بار حافظ اللہ دتہ کاشف، معروف شاعر اور ادیب شاکر حسین شاکر، معروف منقبت خواں سید کاشف رضا زیدی، ڈائریکٹر خانہ فرہنگ سیدہ زاہدہ بخاری اور دیگر نے شرکت کی۔ تقریب میں اہلسنت مدارس کے رہنما علمائے کرام کے ایک وفد نے بھی شرکت کی۔ جشن کے آخر میں آستان قدس رضوی کے تعاون سے امام رضا علیہ السلام سے وابستہ اشیاء کی نمائش بھی لگائی گئی۔ نمائش کا افتتاح علامہ سید مجاہد عباس گردیزی نے کیا۔