کوئٹہ، جماعتِ اسلامی کے صوبائی امیر مولانا عبدالحق ہاشمی کی وفد کے ہمراہ علامہ سید ہاشم موسوی سےملاقات
شیعہ نیوز ( پاکستانی شیعہ خبر رساں ادارہ)جماعت اسلامی کے صوبائی امیر مولانا عبدلالحق ہاشمی اور سینئر صوبائی رہنماء عطا الرحمان کی قیادت میں جماعت اسلامی کے ایک اعلیٰ سطحی وفد نے وحدت ہائوس کوئٹہ کا دورہ کیا اور مجلس وحدت مسلمین کے مرکزی رہنماء اور آئمہ جمعہ فورم کے سیکریٹری علامہ سید ہاشم موسوی سےملاقات کی ۔
زرائع کے مطابق وحدت ہائوس کوئٹہ میں جماعت اسلامی کے اعلیٰ سطحی وفد سے گفتگو کرتے ہوئے علامہ سید ھاشم موسوی نے کہاکہ ہم سب ایک ہیں اور ہماری کامرانی اور ہمارے ملک کی ترقی و کامیابی اسی میں ہے کہ ہم اپنے آپسی تفرقات کو ختم کرکے ایک دوسرے کے شانہ بشانہ کھڑے ہوکر آگے بڑھے۔ ایک دوسرے کا ہاتھ تھامے رکھنے سے ہم اپنے دشمنوں کے عزائم ناکام بناسکتے ہیں۔انہوں نے کہا کہ تفرقات نے آج تک ہمیں سوائے نفرتوں کے کچھ نہیں دیا اور اس سے آگے بھی اگر ہم یہی رویہ اختیار کئے رکھیں گے تو بھی اسکے نتائج مثبت نہیں نکلیں گے ، اتحاد سے منہ موڈنے کی مثال یوں ہے کہ ہم خود اپنے ہی دشمنوں کے مقصد کو پورا کرنے میں انکی مدد کر رہے ہیں اسی لئے بہترین قدم یہی ہے کہ اتحاد کو فروغ ملے۔
جماعتِ اسلامی کے صوبائی امیر مولانا عبدلالحق ہاشمی اور سینئر صوبائی رہنماء عطا الرحمان سے بات کرتے ہوئے علامہ سید ہاشم موسوی کا کہنا تھا کہ مجلس وحدت مسلمین پاکستان ہمیشہ سے اتحاد و اتفاق کو فروغ دینے میں کوشاں نظر آئی ہے اور ہمارے جماعت کے خدمات پر بھی نظر ڈالی جائے تو ہم نے تمام طبقات ، مذاہب اور اقوام سے تعلق رکھنے والوں کی خدمت کی ہے۔ جب کوئی سیاسی قوت اتحاد بین المسلین کیلئے مسلسل کوششیں جاری رکھے گی تو اسکے نتائج ضرور نظر آئیں گے اور اسی طرح اگر تمام جماعتیں اور ادارے اتحاد کے فروغ کیلئے آگے بڑھے تو ملک میں جہاں تکفیریت کا خاتمہ ہوگی وہی ترقی اور خوشحالی کی راہ ہموار ہوگی۔ عوام الناس بھی کسی دوسرے مسلک، مذہب یا قوم کو آپ سے الگ نہ سمجھے، جتنا حق ہمارا ہے اتنا ہی حق دوسروں کا بھی ہیں۔
