پاکستان کو چاہیئے کہ چین اور ایران کے ساتھ مل کر امریکہ اور بھارت کا مقابلہ کرے، ثروت اعجاز قادری
شیعہ نیوز ( پاکستانی شیعہ خبر رساں ادارہ)سربراہ پاکستان سنی تحریک محمد ثروت اعجاز قادری نے کہا ہے کہ امریکہ اور بھارت کے جنگی تعاون کے معاہدے خطے کی سلامتی کے لئے خطرہ ہیں، امریکہ پاکستان کے ساتھ منافقانہ کھیل کھیل رہا ہے، مسئلہ کشمیر کو دبانے اور پاک چین راہداری کو متاثر کرنے کیلئے امریکہ اوچھے ہتھکنڈوں پر اتر آیا ہے، بھارت کے سر پر جنگی جنون سوار ہے جو پاکستان کو خوف میں مبتلا کرنے کے جھوٹے خواب دیکھ رہا ہے، پاکستان خود مختار اور اٹیمی قوت ہے امریکہ اور بھارت ایسے کسی بھی حربے سے پاکستان کو ڈرایا نہیں جا سکتا، کشمیری مسلمانوں کی آزادی ایک حقیقت ہے جسے امریکہ، بھارت سمیت پوری دنیا کو تسلیم کرنا ہی ہوگا۔
زرائع کے مطابق پاکستان سنی تحریک کے سربراہ محمد ثروت اعجاز قادری نے پنجاب کے صوبائی رہنماؤں کے اہم اجلاس سے ٹیلی فونک خطاب کرتے ہوئے کہا کہ کشمیر پاکستان کی شہہ رگ ہے، بھارت نے کشمیر کو جتنا آسان ہدف سمجھ رکھا ایسا ممکن نہیں کہ کشمیریوں کو ان کا حق خود ارادیت نہ دیا جائے، کشمیریوں کو آزادی دیئے بغیر دنیا میں سلامتی کو یقینی نہیں بنایا جا سکتا۔ محمد ثروت اعجاز قادری نے کہا کہ پاکستان کو چاہیئے کہ چین، ایران اور افغانستان کے ساتھ مل کر امریکہ اور بھارت کے منفی عزائم کا مقابلہ کرے، پاکستان کی خود مختاری پر کسی کو ضرب نہیں لگانے دی جائے گی۔
ثروت اعجاز قادری کا کہنا تھا کہ پاک چین اقتصادی راہداری کسی بھی دوسرے ملک کیلئے باعث تشویش یا خطرہ نہیں ہے، پاک چین اقتصادی راہداری منصوبہ خطے میں معاشی انقلاب برپا کرے گا، امریکہ کو چاہیئے کہ وہ بھارت کے جنگی جنون کو بڑھانے اور بڑھکانے کی بجائے خطے کی سلامتی اور امن کیلئے معاشی استحکام لائے تاکہ دنیا کو غربت اور جہالت کی بدولت ہونے والی تباہی سے بچایا جا سکے۔ ثروت اعجاز قادری نے کہا کہ امریکہ کو چاہیئے کہ وہ بھارت کے ساتھ جنگی معاہدوں کی بجائے غربت اور بے روزگاری ختم کرنے کے معاہدے کرے تاکہ غربت سبب بھارت میں ہونے والی ہلاکتوں میں کمی لائی جا سکے۔ انہوں نے کہا کہ اگر امریکہ اور بھارت یہ سوچتے ہیں کہ وہ خطے میں طاقت کا توازن بگاڑ کر مسئلہ کشمیر سے پاکستان اور دنیا کی توجہ ہٹا دیں گے تو یہ ان کی خام خیالی ہے۔
