مرحوم احمد علی قصوری انقلاب اسلامی اور امام خمینیؒ کے مداح تھے، علامہ سبطین سبزواری

شیعہ نیوز ( پاکستانی شیعہ خبر رساں ادارہ) شیعہ علماء کونسل پنجاب کے صدر علامہ سید سبطین حیدر سبزواری، سینیئر نائب صدر مولانا موسٰی رضا جسکانی اور جنرل سیکرٹری مولانا مشتاق حسین ہمدانی نے ممتاز سنی عالم دین علامہ احمد علی قصوری کی وفات پر اظہار افسوس کرتے ہوئے عالم اسلام خصوصاً اہلسنت مسلک کا عظیم نقصان قرار دیا ہے۔

زرائع کے مطابق علامہ سید سبطین سبزواری نے علامہ احمد علی قصوری کی وفات پر اپنے تعزیتی بیان میں کہا علماء انبیاء کے وارث ہیں، جنہوں نے علوم اسلامیہ کو عوام تک پہنچایا اور آج شریعت محمدی تروتازہ شکل میں معاشرے میں موجود نظر آتی ہے، یقیناً ایسے معتدل علماء کی وفات سے خلا پیدا ہوتا ہے، جسے پورا نہیں کیا جا سکتا۔ ان کا کہنا تھا کہ علامہ احمد علی قصوری کی وفات صرف اہلسنت ہی نہیں، تمام مکاتب فکر کیلئے صدمے کا باعث ہے۔ علامہ سبطین سبزواری نے کہا کہ علامہ احمد علی قصوری سے پروگراموں میں ملاقات ہوتی رہتی تھی، وہ اپنے مسلک کو واضح انداز میں پیش کرتے تھے، اذان سے پہلے اور بعد میں درود و سلام پڑھنے پر پابندی کیخلاف ان کی حکمرانوں کے سامنے واضح موقف ان کے نڈر خیالات کی عکاسی کرتے تھے۔

علامہ سید سبطین سبزواری نے کہا کہ علامہ ساجد علی نقوی کیساتھ تحریک منہاج القرآن کے سرپرست علامہ طاہرالقادری کے طے پانے والے اعلامیہ وحدت پر علامہ احمد علی قصوری کے بھی دستخط موجود ہیں، جس سے اندازہ کیا جاسکتا ہے کہ وہ اتحاد بین المسلمین کے بانی ارکان میں سے تھے۔ مرحوم انقلاب اسلامی ایران اور حضرت امام خمینی کے بھی مداح تھے۔ شیعہ رہنماؤں نے احمد علی قصوری کے خاندان سے اظہار تعزیت کرتے ہوئے ان کیلئے جنت الفردوس میں اعلٰی مقام کی دعا کی ہے۔