خیبر پختونخوا کے بہادر سپوت جنید نے جان دے کر سینکڑوں زندگیاں بچالیں

شیعہ نیوز ( پاکستانی شیعہ خبر رساں ادارہ)مردان کچہری کے باہر تکفیری دہشتگردوں کے خودکش حملے میں خیبر پختونخوا پولیس کے جوان نے اپنی جان دے کر سینکڑوں زندگیاں بچا کر بہادری کی نئی داستان رقم کر دی۔

ذرائع کے مطابق کانسٹیبل جنید حسب معمول ڈیوٹی دینے مردان کچہری پہنچا تو ایک تکفیری خودکش بمبار نے کچہری گیٹ کے باہر اندھا دھند فائرنگ کر دی، گولیاں لگنے سے کانسٹیبل جنید اور اس کا ساتھی اعظم زخمی ہوگئے، مگر جنید نے ہمت نہ ہاری اور تکفیری دہشتگرد خودکش حملہ آور کو روکتے ہوئے اپنی بندوق کا منہ کھول دیا۔ تکفیری خودکش حملہ آور نے بدحواس ہوکر دھماکہ کر دیا، جس میں جنید جان کی بازی ہار گیا مگر اس دلیر سپاہی نے شجاعت کی نئی داستان رقم کر دی۔کانسٹیبل جنید کی قربانی کو آئی جی خیبر پختونخوا نے شاندار الفاظ میں خراج عقیدت پیش کیا۔

اطلاعات کے مطابق شھید کانسٹیبل جنید کی عید الاضحٰی کے بعد شادی تھی، جبکہ شہید کے اہل خانہ نے اپنے بیٹے کی شہادت پر فخر کا اظہار کیا ہے۔ واضح رہے کہ مردان کے ضلع کچہری گیٹ پر سفاک تکفیری دہشتگرد کے خودکش حملے کے نتیجے میں پولیس اہلکاروں اور وکلاء سمیت 13 افراد شھید اور 40 زخمی ہوئے تھے۔