علامہ تصور جوادی مظفرآباد میں شیعہ سنی وحدت کی علامت سمجھے جاتے ہیں، ان پر حملہ دشمن کی ایک سوچی سمجھی سازش ہے

شیعہ نیوز ( پاکستانی شیعہ خبر رساں ادارہ ) مجلس وحدت مسلمین پاکستان کے مرکزی ڈپٹی سیکرٹری جنرل علامہ سید احمد اقبال رضوی نے وحدت ہاؤس کراچی میں ہنگامی پریس کانفرنس کرتے ہوئے ایم ڈبلیو ایم آزاد کشمیر کے سیکرٹری جنرل علامہ تصور جوادی پر مظفرآباد میں قاتلانہ حملے، سانحہ لاہور و پارا چنار اور شہر کراچی میں ایک بار پھر بڑھتی ہوئی شیعہ ٹارگٹ کلنگ کی مذمت کرتے ہوئے کہا ہے کہ دہشت گردوں کی کارروائیاں ملکی سلامتی و استحکام کے لئے خطرناک صورت اختیار کرتی جا رہی ہیں، ملک دشمن طاقتیں مذہبی ہم آہنگی و رواداری کا پرچار کرنے والی شخصیات کو نشانہ بناکر ملک کو تفرقہ بازی کی آگ میں دھکیلنا چاہتی ہیں، ان تکفیری گروہوں کا خاتمہ ملکی سلامتی و امن کے لئے انتہائی ضروری ہے، علامہ تصور جوادی مظفرآباد میں شیعہ سنی وحدت کی علامت سمجھے جاتے ہیں، ان پر حملہ دشمن کی ایک سوچی سمجھی سازش ہے۔ انہوں نے کہا کہ دہشت گردی کا خاتمہ حکومت کے محض بلند و بانگ دعوؤں سے نہیں ہوگا، اس کے لئے سیاسی مصلحتوں سے بالاتر ہوکر فیصلہ کن اقدامات کرنے ہوں گے، پورے ملک میں دہشت گردوں کی بلا روک ٹوک نقل و حرکت حکومت کی ناکارہ پالیسیوں اور امن و امان کے ذمہ دار اداروں کی مجرمامہ غفلت کا نتیجہ ہے۔ ہنگامی پریس کانفرنس میں علامہ مرزا یوسف حسین، علامہ علی انور جعفری، علامہ مبشر حسن بھی موجود تھے۔

علامہ احمد اقبال رضوی نے کہا کہ مظفرآباد ملک کا ایک حساس ترین شہر ہے، جہاں فوجی چھاؤنی کے علاوہ ملک کی مختلف خفیہ ایجنسیوں کے دفاتر بھی موجود ہیں، ملک کے ایسے حساس علاقے میں دہشت گردی کی کارروائی متعلقہ اداروں کی ناکامی کو ظاہر کرتی ہے، مظفرآباد کی تاریخ میں دہشت گردی کا پہلا واقعہ مسلم لیگ نون کی حکومت کے دوران پیش آیا، جس سے بہت سارے سوالات اٹھنا شروع ہوگئے ہیں، کالعدم مذہبی جماعتوں اور سہولت کاروں کے لئے حکمران جماعت کا نرم گوشہ ملک میں دہشت گردی کا ایک واضح سبب ہے، نیشنل ایکشن پلان پر اگر مکمل طور پر عمل کیا جاتا تو آج ملک میں امن و امان کی صورتحال مختلف ہوتی، پارا چنار اور لاہور بم دھماکے کے بعد مظفرآباد میں دہشت گردی کی حالیہ کارروائی کو اگر عالمی تناظر میں دیکھا جائے تو یہ پاک چائنا اقتصادی راہدری منصوبے کے خلاف بھی سازش ہے، امریکہ، بھارت اور کچھ خلیجی ریاستیں پاکستان کو مستحکم نہیں دیکھنا چاہتیں اور سی پیک کے خلاف سازشوں میں مصروف ہیں، پاکستان کے امن کو خراب کرکے پاکستان کو ایک غیر محفوظ ریاست ثابت کرنے کی مذموم کوشش کی جا رہی ہے، اس کوشش کو ناکام بنانے کا واحد حل دہشت گرد عناصر اور سہولت کاروں کے خلاف بھرپور کارروائی ہے۔ انہوں نے کہا کہ آزادی کے بیس کیمپ میں دہشت گردوں کی موجودگی مقبوضہ کشمیر میں آزادی کی تحریک کو سبوتاژ کرکے رکھ دے گی، مظفر آباد کی پرامن فضا کو دہشت زدہ بنانے والوں کے ساتھ آہنی ہاتھوں سے نمٹا جائے۔

انہوں نے کہا کہ شہر کراچی میں بڑھتی ہوئی ٹارگٹ کلنگ نے ایک بار پھر پولیس اور رینجرز کی کارکردگی پر سوالیہ نشان کھڑا کر دیا ہے، بڑھتی ہوئی دہشت گردی شہر کراچی میں امن کی فضاء کو نقصان پہنچانے کے ساتھ ساتھ کراچی آپریشن میں ملنے والی کامیابیوں کو بھی ناکام بنا رہی ہے۔ انہوں نے مطالبہ کیا کہ ملک بھر میں کالعدم مذہبی جماعتوں کے خلاف فوری آپریشن کیا جائے، فوجی عدالتوں سے جن دہشت گردوں کو سزائیں سنائی جا چکی ہیں، ان پر فوری عمل درآمد کیا جائے اور رکاوٹ بننے والے عناصر کے خلاف بھی کارروائی کی جائے، وزیراعلٰی سندھ شہر کراچی میں بڑھتی ہوئی ٹارگٹ کلنگ اور دہشتگردی کا فی الفور نوٹس لیتے ہوئے کالعدم دہشت گرد تنظیموں اور ان کے سہولت کاروں کے خلاف آپریشن کا آغاز کریں۔ مجلس وحدت مسلمین کی طرف سے جمعہ کے روز ”یوم احتجاج“ منانے کا بھی اعلان کیا گیا، جمعے کے روز کراچی سمیت ملک کے تمام بڑے شہروں میں علامہ تصور جوادی پر قاتلانہ حملے، کالعدم دہشت گرد تنظیموں کی فعالیت، نیشنل ایکشن پلان پر عدم عملدرآمد، پاراچنار اور لاہور میں دہشت گردی کے واقعات کے خلاف احتجاج کئے جائیں گے۔