قانون نافذ کرنے والے اداروں کی بروقت کارروائی سے کوئٹہ بڑی تباہی سے بچ گیا

شیعہ نیوز ( پاکستانی شیعہ خبر رساں ادارہ ) کوئٹہ : قانون نافذ کرنے والے اداروں کی بروقت کارروائی سے کوئٹہ بڑی تباہی سے بچ گیا، سڑک کنارے رکھے گئے دو بموں کو بی ڈی ایس نے ناکارہ بنادیا۔ پولیس حکام کے مطابق کوئٹہ شہر کے نواحی علاقے اسپنی روڈ پر ایس ایس پی ٹریفک کے دفترکے قریب سڑک کنارے مشکوک بیگ کی موجودگی کی اطلاع پر بم ڈسپوزل اسکواڈ کو طلب کیا گیا۔ بی ڈی ایس نے بیگ کو چیک کیا تو اس میں دو بم موجود تھے۔ بم ڈسپوزل اسکواڈ نے دو گھنٹوں کی جدوجہد کے بعد انسٹرکٹر گن کے ذریعے فائر کرکے دونوں بم ناکارہ بنادیئے، پولیس حکا م کا کہنا ہے کہ دونوں بم پانچ سے سات کلو وزنی تھے۔

واضح رہے کہ کوئٹہ اکثر و بیشتر دہشت گردانہ کارروائیوں کی زد میں آتا رہتا ہے۔ اس سے قبل یکم مارچ کو لنک سریاب روڈ پر سیکورٹی فورسز کی چیک پوسٹ کے قریب دھماکے میں 2 سیکورٹی اہلکاروں سمیت 4 افراد زخمی ہوگئے تھے۔ ملک میں جاری حالیہ دہشت گردی کی لہر پر قابو پانے کے لیے آپریشن رد الفساد کا بھی آغاز کیا جا چکا ہے جس کے تحت روزانہ درجنوں مشتبہ افراد گرفتار کیے جارہے ہیں۔ ملک بھر میں سیکیورٹی فورسز و پولیس کی کارروائیوں میں اب تک کئی دہشت گرد ہلاک بھی ہوچکے ہیں۔