کراچی ایک بار پھر فائرنگ کی زد میں

شیعہ نیوز (پاکستانی شیعہ خبر رساں ادارہ) شہر قائد کے علاقے ناظم آباد میں دہشتگردوں نے مسافر بس پر فائرنگ کر دی، حملے میں متعدد افراد زخمی ہوگئے۔

تفصیلات کے مطابق کراچی میں دہشتگرد بے قابو ہوگئے، کراچی کے علاقے ناظم آباد نمبر دو نشان حیدر چوک پر دہشت گردوں نے گھات لگا کر مسافر بس پر حملہ کر دیا۔ حملہ آوروں نے چاروں اطراف سے بس پر گولیوں کی بارش کر دی جس سے تین افراد زخمی ہوئے۔

پولیس کے مطابق تینوں افراد کو ٹانگوں پر گولیاں لگیں۔ عینی شاہدین کا کہنا ہے کہ حملہ آور دو موٹر سائیکلوں پر سوار تھے۔ زخمیوں کو طبی امداد کیلئے عباسی شہید اسپتال منتقل کر دیا گیا ہے، زخمیوں کی شناخت مہتاب، غلام اور عمیر کے ناموں سے ہوئی ہے، زخمیوں کی عمریں 25 سے 30 سال کے درمیان ہیں۔ حملے کے بعد بس کا ڈرائیور فرار ہوگیا۔