محکمہ داخلہ حکومت پنجاب نے جلسے جلوسوں پر پابندی عائد کر دی

شیعہ نیوز ( پاکستانی شیعہ خبر رساں ادارہ ) محکمہ داخلہ حکومت پنجاب نے جلسے جلوسوں پر پابندی عائد کر دی ہے۔ جلسوں اور ریلیوں پر پابندی 11 جون تک عائد کی گئی ہے۔ عوامی مقامات پر حقہ اور شیشہ پینے پر بھی پابندی ہوگی۔ تفصیلات کے مطابق محکمہ داخلہ پنجاب نے اعلامیہ جاری کرتے ہوئے کہا کہ ڈپٹی کمشنر کی پیشگی اجازت کے بغیر جلسے جلوس کی اجازت نہیں ہوگی، اس حوالے سے دفعہ 144 نافد کر دی گئی ہے جس کے تحت جلسے جلوسوں پر پابندی 11 جون تک عائد کی گئی ہے۔ محکمہ داخلہ کے اعلامیے کے مطابق جلسے، جلوسوں اور کھیلوں کی فضائی کوریج پر بھی دفعہ 144 کے تحت پابندی ہوگی، جبکہ عوامی مقامات پر حقہ اور شیشہ پینے پر بھی پابندی عائد کر دی گئی ہے۔