لاہور پریس کلب کے باہر آئی ایس او کی مردہ باد امریکہ و اسرائیل ریلی، طلباء کی بھرپور شرکت

شیعہ نیوز ( پاکستانی شیعہ خبر رساں ادارہ ) امامیہ اسٹوڈنٹس آرگنائزیشن پاکستان کے زیراہتمام ملک بھر میں یوم مردہ باد امریکا و اسرائیل مناتے ہوئے ریلیوں کا انعقاد کیا گیا۔ شرکا ریلیوں نے بینرز، کتبے اٹھا کر امریکا و اسرائیل کی اسلام دشمنی کیخلاف نعرے بازی کی اور امریکا کو دنیا بھر میں دہشتگردی اور بربریت کا سرغنہ قرار دیا جو اپنے بغل بچے اسرائیل کے ناجائز وجود کو تقویت دینے کی کوششیں تسلسل سے جاری رکھے ہوئے ہے۔ یوم مردہ باد امریکا و اسرائیل کے موقع پر لاہور پریس کلب کے سامنے ریلی نکالی گئی۔ ریلی کے شرکاء سے خطاب کرتے ہوئے مقررین نے کہا کہ امریکا اور اسرائیل دنیا بھر میں مسلمانوں کیخلاف مختلف محاذوں پر سرگرم ہیں اور مختلف ہتھکنڈوں کے ذریعے مسلمانوں کی وحدت کو پارہ پارہ کرنے کی کوشش کر رہے ہیں۔ آئی ایس او پاکستان کے مرکزی رہنماء قاسم شمسی کا کہنا تھا کہ امریکہ اور اسرائیل خود بھی مسلمانوں کا خون بہا رہے ہیں اور اپنے آلہ کاروں کو مسلمانوں میں داخل کرکے قتل و غارت گری کا بازار گرم کئے ہوئے ہیں اور نام نہاد مسلمانوں سے شام اور اردن میں صحابہ کرام کے مزارات کی بے حرمتی اور ان مزارات کو نذرآتش کرنے جیسے واقعات رونما ہو رہے ہیں۔ ڈویژنل صدر علی زیدی نے اپنے خطاب میں وطن عزیز پاکستان میں بیرونی مداخلت روکنے کیلئے تمام مکاتب فکر کے متفقہ کردار ادا کرنے کی ضرورت پر زور دیا جبکہ 16 مئی 1948 کو قائم کی گئی ناجائز ریاست اسرائیل کی نابودی کیلئے مسلمانوں میں اتحاد و یکجہتی کی ضرورت پر زور دیا گیا۔

مقررین نے کہا کہ فلسطین فلسطینیوں کا نہیں بلکہ امت مسلمہ کا مسئلہ ہے، جس کے حل کیلئے پوری امت کا اپنا کردار ادا کرنا ہوگا۔ انہوں نے کہا کہ آئی ایس او پاکستان کے نوجوان وطن عزیز پاکستان کی نظریاتی و جغرافیائی سرحدوں کے محافظ ہیں اور امت مسلمہ کیساتھ شانہ بشانہ کھڑے ہیں، خطے کی مسلمان اقوام کو اپنی باہمی طاقت کا یقین ہو چلا ہے، بیداری کا یہ سلسلہ یونہی جاری رہے گا اور وہ وقت قریب ہے کہ جب فلسطین اور قبلہء اول آزاد ہو کر نئے اسلامی عزت و آبرو اور سربلندی کے ساتھ عالمی نقشے پر ابھرے گا، لیبیا، تیونس، یمن، مصر اور بحرین میں شہداء کے گرتے ہوئے ہر قطرہ خون سے عالم اسلام میں ایک نیا مجاہد جنم لے رہا ہے، اب ہر جگہ امریکہ اور اسرائیل مردہ باد کے فلک شگاف نعرے پہلے سے زیادہ جوش و جذبے سے لگائے جائیں گے اور ہر گلی کوچہ میں امریکی اور اسرائیلی پرچم نذر آتش کیا جائے گا! آل سعود، امریکہ و اسرائیل کے مکروہ عزائم کو عملی جامہ پہنانے کیلئے کوششوں میں مصروف ہیں، آج کا امریکہ اور اسرائیل مردہ باد دن درحقیقت عرب غدار حکمرانوں کیلئے موت کا پیغام لائے گا۔