فلسطین فاؤنڈیشن پاکستان کا وفد عالمی فلسطین کانفرنس میں شرکت کے لئے روانہ

شیعہ نیوز (پاکستانی شیعہ خبر رساں ادارہ) فلسطین فاؤنڈیشن پاکستان کا چھ رکنی وفد فلسطین فاؤنڈیشن پاکستان کے مرکزی سیکرٹری جنرل صابر ابو مریم کی قیادت میں عالمی فلسطین کانفرنس ’’الوعد الحق‘‘ (سچا وعدہ) میں شرکت کے لئے روانہ ہوگیا۔

اطلاعات کے مطابق وفد میں جماعت اسلامی پاکستان کے رہنما سابق رکن قومی اسمبلی محمد حسین محنتی، پاکستان مسلم لیگ نواز کے رہنما اور وفاقی وزیر برائے مذہبی امور کے ترجمان پیرزادہ ازہر علی شاہ ہمدانی، جماعت اہلسنت پاکستان کے مرکزی رہنما علامہ شبیر انجم، مجلس وحدت مسلمین پاکستان کے مرکزی رہنما مولانا باقر زیدی اور معروف سماجی کارکن حیدر زیدی شریک ہیں۔

واضح رہے کہ علمائے مقاومت کے عالمی اتحاد کی جانب سے منعقد ہونے والی دو روزہ عالمی فلسطین کانفرنس کا انعقاد لبنان کے دارالحکومت بیروت میں کیا جا رہاہے جہاں مفتی اعظم القدس و فلسطین سمیت مفتی اعظم لبنان، عراق، شام، یمن سمیت عرب اور افریقی ممالک کے جید علمائے کرام، اسکالرز اور تحریک آزادی فلسطین کے لئے سرگرم عمل جماعتوں بشمول حماس، حزب اللہ، جہاد اسلامی، پاپولر فرنٹ، پی ایل او اور دیگر کے اعلیٰ سطح کے قائدین شریک ہو ں گے۔