کراچی،ایس یو سی کے رہنماء یعقوب شہباز کیجانب سے اپوزیشن لیڈر جی بی کیپٹن (ر) شفیع کے اعزاز میں عشائیہ

شیعہ نیوز(پاکستانی شیعہ خبر رساں ادارہ )شیعہ علماء کونسل سندھ کے نائب صدر و پولیٹیکل سیکرٹری محمد یعقوب شہباز نے کراچی میں اپنی رہائش گاہ پر اپوزیشن لیڈر گلگت بلتستان اسمبلی کیپٹن (ر) محمد شفیع کے اعزاز میں عشائیہ دیا، جس میں ایس یو سی سندھ کے صدر علامہ سید ناظر عباس تقوی، علامہ عابد عرفانی، علامہ کامران عابدی سمیت دیگر ذمہ داران اور کارکنان نے بڑی تعداد میں شرکت کی۔ اس موقع پر خطاب کرتے ہوئے کیپٹن (ر) محمد شفیع کا کہنا تھا کہ گلگت بلتستان کے لوگوں کا سی پیک میں جو حق بنتا ہے، اس میں کسی بھی قسم کی بددیانتی ناقابل قبول ہے، جو سازشی عناصر اس خطے میں بسنے والوں کو ان کے جائز حقوق سے محروم رکھنا چاہتے ہیں، ان کی سازشوں کو ناکام بنانے کی ضرورت ہے۔ انہوں نے کہا ہے کہ گلگت بلتستان اور فاٹا کے عوام کو آئینی حقوق سے دور رکھنا ناانصافی ہے، کسی بھی ملک میں بسنے والے افراد کو سیاسی و معاشرتی اعتبار سے یکساں حقوق کی فراہمی ریاست کی ذمہ داری ہے۔

کیپٹن (ر) محمد شفیع نے کہا کہ قبائلی علاقہ جات اور گلگت بلتستان کی عوام کا حصولِ پاکستان ک جدوجہد میں اہم اور نمایاں کردار رہا ہے، گلگت بلتستان کے مسئلے پر سیاست چمکانے کی بجائے حقائق کو مدنظر رکھتے ہوئے مثبت فیصلہ سازی وقت کی اہم ضرورت ہے۔ انہوں نے کہا کہ معدنی ذخائر و دیگر اعتبار سے گلگت بلتستان میں بے پناہ وسائل موجود ہیں، جن سے حاصل ہونے والی آمدنی میں سے گلگت بلتستان کا بھی حصہ ہونا چاہئے۔ تقریب کے آخر میں یعقوب شہباز کا کہنا تھا کہ ہم کیپٹن (ر) شفیع کی اُن تمام کاوشوں کو قدر کی نگاہ سے دیکھتے ہیں، جو انہوں نے گلگت بلتستان اور وہاں کی عوام کیلئے کیں اور ساتھ ساتھ یہ امید بھی کرتے ہیں کہ کیپٹن (ر) شفیع عوام کی خدمت کا یہ سلسلہ اسی طرح جاری رکھیں گے۔