بلوچستان کابینہ کا اجلاس، کوئٹہ سیف سٹی پروجیکٹ کیلئے خریداری پیپرا رولز سے مستثنٰی
شیعہ نیوز(پاکستان شیعہ خبر رساں ادارہ ) وزیراعلٰی بلوچستان میر عبدالقدوس بزنجو کی زیرصدارت منعقد ہونے والے صوبائی کابینہ کے اجلاس میں محکمہ صحت کی جانب سے مجوزہ بلوچستان ہیلتھ پالیسی کے مسودہ پر تفصیلی بریفنگ دی گئی۔ کابینہ نے تفصیلی غور و خوض کے بعد مجوزہ ہیلتھ پالیسی کے مسودہ کو وزیر صحت کی سربراہی میں کابینہ کی ذیلی کمیٹی کے حوالے کرنے کا فیصلہ کیا، جو کابینہ کے ممبران کی تجاویز کی روشنی میں اپنی سفارشات مرتب کرے گی اور مجوزہ ہیلتھ پالیسی کا جامع مسودہ کابینہ کے آئندہ اجلاس میں پیش کرے گی۔ کابینہ نے اس امر پر اتفاق کیا کہ بلوچستان کے عوام کو بنیادی صحت کی سہولتوں کی فراہمی کے لئے ہیلتھ پالیسی کا فوری نفاذ اشد ضروری ہے۔ موجودہ حکومت اپنی مدت پوری کرنے سے قبل ہیلتھ پالیسی کا نفاذ کرے گی اور اس میں مزید تاخیر نہیں ہونے دی جائے گی۔ صوبائی کابینہ نے کوئٹہ سیف سٹی پروجیکٹ کو بلوچستان پبلک پروکیورمنٹ ریگولیٹری اتھارٹی کی بعض شقوں سے مستثنٰی قرار دینے کی منظوری دے دی، جس کا مقصد منصوبے پر فوری عملدرآمد کو یقینی بنانا ہے۔ کابینہ نے کوئٹہ شہر کی حفاظت اور عوام کے جان و مال کے تحفظ کے لئے کوئٹہ سیف سٹی پروجیکٹ پر فوری عملدرآمد کو ناگزیر قرار دیا۔ صوبائی کابینہ نے بلوچستان سول کورٹس آرڈیننس 1962 اور بلوچستان سول ڈسپیوٹس شریعت اپلیکیشن ریگولیشن 1976ء کے تحت محکمہ قانون کی جانب سے سول عدالتوں کے حدود اور ان کے ہیڈ کوارٹر کے ازسر نو تعین کے نوٹیفکیشن کے اجراء کی منظوری بھی دی۔
کابینہ کے اجلاس میں وزیراعلٰی بلوچستان کے ڈویژنل ہیڈ کوارٹروں میں بنیادی ڈھانچہ کی ترقی کے پروگرام کے تحت پی ایس ڈی پی2017-18 اسکیم نمبر 2734 کے تحت بلوچستان کے صنعتی شہر حب کے بنیادی ڈھانچہ کی بہتری کے منصوبہ کی بھی منظوری دی۔ اجلاس میں فیصلہ ہوا کہ حب ماڈل سٹی کیلئے ایک ارب 80 کروڑ روپے کی منظوری دی جائے، پراجیکٹ میں کسی قسم کی کوتاہی برداشت نہیں کی جائے گی۔ حب ماڈل سٹی پراجیکٹ کے کام میں تیزی لائی جائے۔ اجلاس میں بلوچستان پبلک سروس کمیشن کے ایکٹ 1989ء میں آئین کے آرٹیکل 242 کی رو سے مجوزہ ترمیم کی بھی منظوری دی گئی۔ کابینہ نے چیئرمین بلوچستان پبلک سروس کمیشن کی مدت تعیناتی میں دو سال کی توسیع کی بھی منظوری دی، جس کے تحت موجودہ چیئرمین پبلک سروس کمیشن پانچ سال کے عرصہ تک اس عہدے پر فائز رہیں گے۔ اجلاس میں سرکاری ہسپتالوں میں صحت و صفائی کی بہتری اور عام آدمی کو علاج و معالجہ کی بہتر سہولتوں کی فراہمی کو ہر صورت یقینی بنانے کے عزم کا اظہار کرتے ہوئے محکمہ صحت کو اس حوالے سے مؤثر اور جامع اقدامات کرنے کی ہدایت کی گئی۔ اجلاس سے خطاب کرتے ہوئے وزیراعلٰی نے کہا کہ صوبائی کابینہ کے تسلسل کے ساتھ اجلاسوں کے انعقاد کا مقصد اس فورم کے ذریعہ اہم صوبائی امور کے حوالے سے فیصلے کرنا اور حکومتی مشینری کو گائیڈ لائن دینا ہے، لہٰذا تمام محکمے اور ادارے صوبائی کابینہ کے فیصلوں پر من و عن عمل کرنے کے پابند ہیں۔
