انصافی حکومت میں عدالت بدلی نہ پولیس نہ لاپتہ اسیر بازیاب کرائے گئے، علی حسین نقوی

شیعہ نیوز (پاکستانی شیعہ خبر رساں ادارہ) مجلس وحدت مسلمین صوبہ سندھ کے پولیٹیکل سیکریٹری سید علی حسین نقوی نے میڈیا سیل سے جاری اپنے بیان میں کہاکہ موجودہ حکومت کے پاس مہنگائی پر قابو پانے کا کوئی ٹھوس اور موثر لائحہ عمل نظرنہیں آتا ،حکومت مہنگائی کا خاتمہ کرنے میں مکمل طور پر ناکام ہوچکی ہے،موجودہ حکومت غربت کا خاتمہ کرنے کے بجائے غریبوں اور مڈل کلاس کا خاتمہ کرتی نظر آرہی ہے، مہنگائی کے سبب سفید پوش طبقات کا جینا دشوار ھوچکا ہے۔عوام پر گرائے جانے والے پٹرول بم کے اثرات فیول ایڈجسٹمنٹ کے نام پر بجلی کے بلوں میں ہوشربا اضافے کی صورت میں سامنے آنے کو ہے۔

انہوںنے کہاکہ موجودہ طرز حکمرانی کو تبدیل کیئے بغیر ملک کو درپیش چیلنجز سے نمٹنا اور مسائل کو حل کرنا ممکن نہیں، موجودہ مسائل کے حل کے لیئے آئین میں ترامیم کرنا اشد ضروری ہے،نہ عدالت بدلی نہ پولیس نہ لاپتہ اسیر بازیاب کرائے گئے نہ مظلوموں کو انصاف دلایا گیا۔نہ بھاشہ ڈیم نہ مہمند ڈیم نہ 50 لاکھ گھر نہ ایک کروڑ نوکریاں نہ زرمبادلہ کی آمد میں اضافہ نہ لوڈ شیڈنگ سے نجات تمام دعوے صرف دعوں تک ہی اب تک محدود ہیں۔ترقی یا پیش رفت اگر کوئی ھوئی ہے تو صرف قرضوں کے حصول میں اضافے کی صورت میں۔ ماسوائے نیپال بھوٹان، ہندوستان، افغانستان، سری لنکا، مالدیپ، صومالیہ سوڈان نائجر یا نائیجیریا کے تقریبا ہر خوشحال ملک سے قرضے لیئے جاچکے ہیں۔ عوام کی مایوسی میں دن بدن اضافہ ہوتا جارہا ہے اگر یہ سلسلہ یونہی جاری رہا تو بعید نہیں کہ عوام کا اعتماد تبدیلی کے نعرے سے جلد اٹھ جائے۔