شمالی وزیرستان، بارودی سرنگ کے دھماکے میں پاک فوج کا جوان شہید، 3 زخمی

شیعہ نیوز(پاکستانی شیعہ خبر رساں ادارہ)شمالی وزیرستان میں بارودی سرنگ کے دھماکے میں پاک فوج کا ایک جوان شہید اور 3 زخمی ہوگئے۔ پاک فوج کے شعبہ تعلقات عامہ ( آئی ایس پی آر) کے مطابق شمالی وزیرستان کے علاقے ڈنڈ کلی میں بم ڈسپوزل ٹیم معمول کے مطابق سرچ و کلئیر آپریشن کر رہی تھی کہ اس دوران بارودی مواد کا دھماکہ ہوا۔ آئی ایس پی آر کے مطابق بارودی مواد کے دھماکے میں میانوالی کے علاقے نمل سے تعلق رکھنے والے حوالدار احمد خان شہید اور 3 جوان زخمی ہوگئے۔ آئی ایس پی آر کا کہنا ہے کہ 38 سالہ شہید احمد خان کے سوگواروں میں ایک بیوہ، بیٹا اور دو بیٹیاں شامل ہیں۔ احمد خان کی شہادت کی اطلاع ملنے پر مقامی لوگ میانوالی سکیسر روڈ پر ڈھوک علی خان سے آگے موجود آبادی ڈھوک جنگوال پر ان کے آبائی گھر میں جمع ہونا شروع ہوگئے اور شہید کی نماز جنازہ 10 بجے اداکی جائے گی اور گارڈ آف آنر کے بعد مقامی قبرستان میں سپرد خاک کیا جائے گا۔ ذرائع کے مطابق شہید احمد خان کے والد مہرخان بھی پاک فوج میں خدمات انجام دے چکے ہیں جبکہ شہید احمد خان کے 5 بھائی ہیں، بھائیوں میں سے شہید دوسرے نمبر پر تھے۔